Weather Alert : महाराष्ट्रासाठी पुढील 24 तास महत्त्वाचे! शनिवारी हवामान विभाकडून नवा अलर्ट

राज्यातील तापमानात सतत चढ-उतार बघायला मिळत आहे. त्यामुळे गारवा कमी झालाय. तसेच विदर्भातील किमान तापमानात घट झालेली दिसून येत आहे. 29 नोव्हेंबर रोजी राज्यात धुक्यासह ढगाळ वातावरण राहण्याची शक्यता आहे. आज 28 नोव्हेंबर रोजी विदर्भातील भंडारा येथे 10 अंश सेल्सिअस किमान तापमानाची नोंद झाली आहे. पाहुयात, 29 नोव्हेंबर रोजी राज्यातील तापमान आणि हवामानाची स्थिती कशी राहील.

मुंबई 29 नोव्हेंबर रोजी धुक्यासह अंशतः ढगाळ आकाश राहण्याची शक्यता आहे. तेथील कमाल तापमान 32 अंश सेल्सिअस तर किमान तापमान 22 अंश सेल्सिअस इतकं असू शकतं. कोकण विभागातील जिल्ह्यात देखील काहीशी अशीच स्थिती राहण्याची शक्यता आहे.

पश्चिम महाराष्ट्रातील पुणे शहरांत मुख्यतः निरभ्र आकाश असणार आहे. तेथील कमाल तापमान 31 अंश सेल्सिअस तर किमान तापमान 13 अंश सेल्सिअस इतकं असू शकतं. पुण्यातील तापमानात 2 अंशांनी घट होण्याची शक्यता आहे. कोल्हापूरमधील तापमानात देखील चढ-उतार सुरू आहे. तेथील किमान तापमान 19 अंश सेल्सिअस इतकं असू शकतं.

मराठवाड्यातील छत्रपती संभाजीनगर शहरांत दिवसभर धुकं पडण्याची शक्यता आहे. तेथील कमाल तापमान 29 अंश सेल्सिअस तर किमान तापमान 19 अंश सेल्सिअस इतकं असू शकतं. छत्रपती संभाजीनगर येथील तापमानात 2 अंशांनी वाढ होण्याची शक्यता आहे. मराठवाड्यातील इतर शहरांत देखील तापमानात सातत्याने चढ-उतार सुरू आहे. त्यामुळे गारवा कमी झालाय.

उत्तर महाराष्ट्रातील नाशिकमध्ये सकाळी धुके आणि नंतर आकाश प्रामुख्याने निरभ्र राहण्याची शक्यता आहे. येथील किमान तापमानात 2 अंशांनी वाढ होऊन 18 अंश सेल्सिअस इतकं असू शकतं. तर कमाल तापमान 28 अंश सेल्सिअस इतकं राहण्याची शक्यता आहे.

विदर्भातील तापमानात घट होण्याची शक्यता हवामान विभागानं वर्तवली आहे. विदर्भातील प्रमुख शहर असलेल्या नागपूरमध्ये मुख्यतः निरभ्र आकाश राहण्याची शक्यता आहे. तेथील कमाल तापमान 28 अंश सेल्सिअस तर किमान तापमान 14 अंश सेल्सिअस इतकं असू शकतं. विदर्भातील भंडारा येथे 28 नोव्हेंबर रोजी 10 अंश सेल्सिअस तापमानाची नोंद झाली. तसेच इतरही शहरांत तापमानात घट होत आहे. त्यामुळे रात्री आणि सकाळच्या वेळी गारवा जाणवत आहे.

राज्यातील बहुतांश भागांत सध्या तापमानातील अस्थिरता कायम आहे. पुढील काही दिवस धुके, ढगाळ वातावरण आणि थंडीत होणारे चढ-उतार कायम राहण्याची शक्यता आहे. तापमानातील अचानक घट–वाढीमुळे आरोग्यावर परिणाम होऊ नये यासाठी सावधगिरी बाळगण्याचा सल्ला तज्ज्ञांनी दिला आहे.