Weather update : आजही 'या' राज्यांमध्ये पावसाचा इशारा; महाराष्ट्रातही पाऊस? जाणून घ्या आजचा हवामान अंदाज

नवी दिल्ली, 21 डिसेंबर : भारतीय हवामान विभागाने दिलेल्या माहितीनुसार आज राजधानी दिल्ली आणि परिसरात थंडीचा कडाका आणखी वाढण्याची शक्यता आहे. आज दिल्लीचं किमान तापमान 6 अंश सेल्सिअस तर किमान तापमान 23 अंश सेल्सिअस राहण्याची शक्यता आहे. जम्मू काश्मीर आणि हिमाचल प्रदेशमध्ये जोरदार बर्फवृष्टी सुरू आहे, त्यामुळे मैदानी प्रदेशातील राज्यांमध्ये आता तापमानात घट होण्यास सुरुवात झाली आहे.

दिल्लीसह, उत्तर प्रदेश, बिहार, राजस्थान या राज्यांमध्ये पुढील आठवड्यात तापमानात आणखी घट होण्याचा अंदाज हवामान विभागाकडून वर्तवण्यात आला आहे. उत्तर -पश्चिमेकडून येणाऱ्या थंड वाऱ्यामुळे गारठा वाढणार असल्याचं हवामान विभागानं म्हटलं आहे.

जम्मू काश्मीर आणि हिमाचल प्रदेशमध्ये सध्या जोरदार बर्फवृष्टी सुरू आहे, त्यामुळे येणाऱ्या काळात उत्तरेकडील राज्यात थंडीचा कडाका आणखी वाढण्याची शक्यता हवामान विभागानं वर्तवली आहे.

स्कायमेटने वर्तवलेल्या अंदाजानुसार आजही लक्षद्वीप, तामिळनाडू आणि केरळ या राज्यांमध्ये मेघगर्जनेसह हलक्या ते मध्यम स्वरुपाच्या पावसाची शक्यता आहे. तर इतर राज्यांमध्ये थंडीचा कडाका वाढणार असून, दाट धुकं पडण्याची शक्यता आहे.

महाराष्ट्राबाबत बोलायचे झाल्यास राज्यात वातावरण कोरडं राहणार आहे. येत्या काळात तापमानात आणखी घट होऊन थंडीचा कडाका वाढण्याची शक्यता आहे. राज्यातील अनेक भागात किमान तापमानात मोठी घट झाल्याचं पाहायला मिळत आहे.