शेकडो वर्षांपासून या गावात लग्नच होत नाही, पाहा काय आहे परंपरा?

आपल्या देशात अनेक रूढी आणि परंपरा आजही पाळल्या जातात. अनेक गावात वेगवगेळ्या अशा रूढी आणि परंपरा या चालत आलेल्या असतात. या विषयी आपल्या सर्वाना जाणून घेण्याची ही ईच्छा असतेच. छत्रपती संभाजीनगर जिल्ह्यात असं एक गाव आहे या गावामध्ये मुला-मुलींचे लग्न गावात होत नाहीत.

या गावातील मुला-मुलींचे लग्न गावाच्या बाहेर लावली जातात. शिवाय गावातील घरावर दुसरा मजला चढवला जात नाही. शेकडो वर्षांची ही परंपरा आजही कायम आहे.

छत्रपती संभाजीनगर जिल्ह्यातील पैठण तालुक्यातील चोंढाळा एक छोटसं गाव आहे. या गावामध्ये अनेक रूढी आणि या परंपरा शेकडो वर्षांपासून चालत आलेल्या आहेत. या गावातील गावकरी दत्तात्रेय थोटे सांगतात की, आमच्या गावामध्ये मुला-मुलींचे लग्नही गावात लावले जात नाहीत.

आम्ही गावाच्या बाहेर हे लग्न लावत असतो. या गावाची ग्रामदैवत रेणुका देवी आहे. ही देवी कुमारी आहे म्हणून आम्ही कोणीही गावामध्ये लग्न लावत नाहीत. गावाच्या बाहेरच सर्व लग्न हे लावले जातात.

या मागे कारणं असं की, एक राक्षस देवी सोबत लग्न करण्यासाठी जबरदस्ती येत होता. देवीला लग्न करायचं नव्हतं तरी सुद्धा हा राक्षस लग्नासाठी गावात येत होता. त्यामुळे त्यांच्यासोबत जे येणारे वऱ्हाड येत होतं ते गावाच्या बाहेर शिळा होऊन पडलेले आहे. म्हणजेच या वऱ्हाडाचे हे दगड झालेले आहेत, असं गावकरी दत्तात्रेय थोटे यांनी सांगितलं.

त्यासोबतच या गावांमध्ये तुम्हाला कोणत्याच घरावरती दुसरा मजला हा बघायला भेटणार नाही. यामागे देखील एक विशिष्ट कारण आहे. देवीचे मंदिर त्यापेक्षा उंच आपलं घर नसावं म्हणून या गावात कोणीही घरावरती दुसरा मजला बांधत नाही. इथं असं कोणाला बंधन नाहीये पण या गावात ही परंपरा चालत आलेली आहे. म्हणून कोणीही घरावरती दुसरा मजला बांधत नाही, असं मंदिर पुजारी प्रकाश वानोळे यांनी सांगितलं.

तसंच या गावांमध्ये तुम्हाला कुठल्याच घरामध्ये बाज आणि पलंग बघायला भेटणार नाही. देवी बाजेवरती निद्रा घेते म्हणून, या गावातील गावकरी देखील बाजी वरती न झोपता जमिनीवरती झोपतात. तसंच या गावात जर कोणी बाळंतीण झाली तरी सुद्धा बाळंतिणीला जमिनीवरती झोपवलं जात, असं इथल्या गावातील लोकांनी सांगितलं.

आम्ही पिढ्यानपिडा या देवीची पूजा ही करत आलेलो आहोत. या ठिकाणी दर्शन घेण्यासाठी कोणीही येऊ शकतं. हे मंदिर सर्वांसाठी खुले आहे. तसंच आम्ही इथं कोणताही दक्षिणा किंवा दान या मंदिरात स्वीकारत नाहीत. या गावात जा रूढी परंपरा आहेत त्या गावकऱ्यांना त्यांच्या पूर्वजांनी सांगितलेल्या आहेत, त्यामुळे हे सर्व गावकरी या परंपरा पाळत आलेले आहेत,असंही मंदिर पुजारी प्रकाश वानोळे यांनी सांगितलं. (अपूर्वा तळणीकर, प्रतिनिधी )

(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)