हिंदू वर्षातील शेवटची अमावस्या! आज 'या' 6 वस्तू दान कराच, पितृदोष होईल दूर; लागेल पुण्य

हिंदू पंचांगानुसार फाल्गुन महिन्यातील अमावस्या ही हिंदू वर्षातील शेवटची अमावस्या मानली जाते. आज 18 मार्च 2026 रोजी ही 'दर्श अमावस्या' असून, यानंतर लगेचच नवीन वर्षाची सुरुवात होणार आहे. पितृदोषातून मुक्ती मिळवण्यासाठी आणि पूर्वजांचे आशीर्वाद प्राप्त करण्यासाठी हा वर्षातील सर्वोत्तम दिवस मानला जातो. शास्त्रानुसार, आजच्या दिवशी काही विशिष्ट वस्तूंचे दान केल्यास पितरांना गती मिळते आणि तुमच्या आयुष्यातील आर्थिक, कौटुंबिक अडथळे दूर होऊन मोठे पुण्य लाभते.

काळे तीळ: अमावस्येच्या दिवशी काळ्या तिळाचे दान सर्वात महत्त्वाचे मानले जाते. तर्पण विधीमध्येही याचा वापर होतो. तिळाचा संबंध शनी ग्रहाशी असल्याने, आज काळे तीळ दान केल्यास पितृदोषाचा प्रभाव कमी होतो आणि शनीची साडेसाती किंवा ढैय्येचा त्रास कमी होण्यास मदत होते.

अन्नदान: 'अन्नदान हे सर्वश्रेष्ठ दान' आहे. आजच्या दिवशी गरजू किंवा गरीब व्यक्तीला पोटभर जेवण दिल्याने पितर तृप्त होतात. शक्य असल्यास ब्राह्मणाला घरी बोलावून जेऊ घालावे किंवा शिधा दान करावा. यामुळे घरात कधीही अन्नाची कमतरता भासत नाही.

वस्त्रदान: नवीन वर्षाच्या सुरुवातीपूर्वी जुन्या कर्मांचा क्षय करण्यासाठी वस्त्रदान करावे. गरीब व्यक्तीला पांढरे किंवा काळ्या रंगाचे वस्त्र दान केल्याने पितर प्रसन्न होतात. यामुळे घरातील आजारपण दूर होते आणि सदस्यांना दीर्घायुष्य लाभते, अशी धार्मिक श्रद्धा आहे.

पाणी आणि गूळ: अमावस्या ही उष्णतेचा आणि तहानेचा काळ मानली जाते. आजच्या दिवशी एखाद्या तहानेलेल्या व्यक्तीला पाणी पाजणे किंवा गुळाचे दान करणे अत्यंत शुभ असते. यामुळे कुंडलीतील सूर्य आणि मंगळ ग्रहांचे दोष दूर होतात आणि कामात यश मिळते.

गाय आणि पशूंना चारा: हिंदू धर्मात गोदानाला विशेष महत्त्व आहे. जर गोदान करणे शक्य नसेल, तर आज गाईला हिरवा चारा किंवा गुळ-पोळी खाऊ घालावी. तसेच कावळे आणि कुत्र्यांना अन्नाचा भाग दिल्याने पितरांना तो थेट प्राप्त होतो आणि कुटुंबावर येणारी संकटे टळतात.

दीपदान: अमावस्येच्या रात्री सर्वत्र अंधार असतो. अशा वेळी पिंपळाच्या झाडाखाली किंवा घराच्या मुख्य प्रवेशद्वारावर तिळाच्या तेलाचा दिवा लावणे किंवा मंदिरात दीपदान करणे पुण्यकारक ठरते. यामुळे पितरांना यमलोकातील मार्ग प्रकाशित होतो आणि त्यांचा आशीर्वाद आपल्या पाठीशी कायम राहतो. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)