Pune Crime: 12 वर्षाच्या 'त्या' मुलाची निर्घृण हत्या समलिंगी संबंधाच्या विरोधामुळे? पुण्याला हादरवणाऱ्या प्रकरणात खळबळजनक खुलासा

घरच्या जवळील एका विहिरीजवळ साईराजचा मृतदेह अर्धनग्न अवस्थेत आढळल्याने संपूर्ण परिसरात एकच खळबळ उडाली असून, या घटनेने दहशतीचे वातावरण पसरले आहे. मिळालेल्या प्राथमिक माहितीनुसार, साईराज नेहमीप्रमाणे शाळेतून घरी आला होता. गणवेश बदलून तो खेळण्यासाठी बाहेर पडला, मात्र तो परतलाच नाही. सायंकाळी ५ वाजेच्या सुमारास मांजरेवस्ती परिसरातील एका विहिरीपाशी त्याचा मृतदेह रक्ताळलेल्या आणि अर्धनग्न अवस्थेत सापडला. त्याच्या अंगावर जखमांच्या खुणा असल्याने ही हत्या असल्याचे स्पष्ट झाले आहे. पोलिसांनी तातडीने घटनास्थळी धाव घेत मृतदेह शवविच्छेदनासाठी पाठवला आहे.

याप्रकरणी शिक्रापूर पोलिसांनी तपासाची चक्रे वेगाने फिरवत भावकीतीलच एका तरुणाला ताब्यात घेतले आहे. प्राथमिक तपासातून समोर आलेली माहिती अत्यंत संतापजनक आहे. सूत्रांनी दिलेल्या माहितीनुसार, समलिंगी संबंधाला विरोध केल्यामुळे चिडून या नराधमाने साईराजचा काटा काढला असावा, असा संशय पोलिसांना आहे. सध्या पोलीस संशयित आरोपीची कसून चौकशी करत असून, पोस्टमॉर्टम अहवालानंतर हत्येचे नेमके गूढ उकलणार आहे.