गुढी पाडव्यावर अमावस्येचं सावट, 19 मार्चला गुढी उभारायची की नाही?

यंदा 19 मार्च 2026 रोजी साजरा होणाऱ्या गुढीपाडव्याच्या तारखेबाबत अनेकांच्या मनात संभ्रम आहे. विशेषतः 18 मार्चला असलेली अमावस्या आणि 19 मार्चची तिथी यामुळे "अमावास्येचं सावट" असल्याच्या चर्चा रंगल्या आहेत.

यंदा 18 मार्चला मराठी वर्षातील शेवटची अमावस्या म्हणजेच 'दर्श' अमावस्या आहे. लगेचच दुसऱ्या दिवशी हिंदू नवं वर्षाची सुरुवात होणार आहे. पण यंदा अमावस्येच सावट गुढी पाडव्यावर असल्याचं मानलं जात आहे. मग 19 मार्चला गुढी उभारायची की नाही याबाबत अनेकांना प्रश्न पडला आहे.

उदयतिथीचे महत्त्व: हिंदू शास्त्रानुसार, ज्या दिवशी सूर्योदयाला जी तिथी असते, तोच दिवस सण साजरा करण्यासाठी ग्राह्य धरला जातो. 19 मार्च रोजी सूर्योदयाला चैत्र शुद्ध प्रतिपदा तिथी असल्यामुळे याच दिवशी गुढी उभारणे शास्त्रसंमत आहे. म्हणजे 18 तारखेला ग्रहण असेल तरी तुम्ही 19 मार्चला गुढी उभारू शकता.

अमावास्येची समाप्ती: 18 मार्च रोजी अमावस्या असली तरी तिची समाप्ती 19 मार्चला सकाळी 6 वाजून 52 मिनिटांनी होत आहे. त्यानंतर लगेच प्रतिपदा तिथी सुरू होत असल्याने, गुढी उभारताना अमावास्येचे कोणतेही सावट असणार नाही.

गुढी उभारण्याची अचूक वेळ: अमावस्या संपल्यानंतर म्हणजेच सकाळी 6 वाजून 53 मिनिटांनंतर तुम्ही कधीही गुढी उभारू शकता. सूर्योदयानंतर लगेच गुढी उभारणे अत्यंत शुभ मानले जाते. सकाळी 7:00 ते 10:30 ही वेळ विशेष फलदायी आहे.

साडेतीन मुहूर्तांपैकी एक: गुढीपाडवा हा वर्षातील साडेतीन शुभ मुहूर्तांपैकी एक पूर्ण मुहूर्त आहे. या दिवशी कोणत्याही क्षणी केलेले शुभकार्य यश देणारे असते. तिथीच्या किंचित बदलामुळे या दिवसाचे महत्त्व अजिबात कमी होत नाही.

नूतन वर्षाची सुरुवात: गुढीपाडवा हा महाराष्ट्रात मराठी हिंदू नववर्षाचा पहिला दिवस म्हणून साजरा केला जातो. हा वसंत ऋतूच्या आगमनाचा, नवीन पीक कापणीचा आणि विजयाचा उत्सव आहे. या दिवशी घरोघरी गुढी उभारून, शोभायात्रा काढून आणि नवीन वस्तू खरेदी करून आनंदोत्सव साजरा केला जातो. हा दिवस अत्यंत शुभ मानला जातो.