काळा रंग अशुभ, तर मंगळसूत्रामध्ये काळे मणी शुभ का मानले जातात?

हिंदू धर्मात 'काळा रंग' सहसा शोक किंवा अशुभाचे प्रतीक मानला जातो, त्यामुळे कोणत्याही शुभ कार्यात काळ्या रंगाचे कपडे परिधान करणे टाळले जाते. मात्र, विवाहित स्त्रीच्या सौभाग्याचे लेणे असलेल्या 'मंगळसूत्रामध्ये' काळ्या मण्यांना अनन्यसाधारण महत्त्व आहे.

वाईट नजरेपासून संरक्षण: काळा रंग हा नकारात्मक ऊर्जा शोषून घेणारा मानला जातो. लग्न ही आयुष्यातील एक मोठी आणि आनंदाची घटना असते. पती-पत्नीच्या सुखी संसाराला कोणाचीही वाईट नजर लागू नये, यासाठी मंगळसूत्रात काळे मणी गुंफले जातात. हे मणी नकारात्मकतेला स्वतःमध्ये सामावून घेतात आणि दांपत्याचे रक्षण करतात.

शिव आणि शक्तीचा संगम: धार्मिक शास्त्रानुसार, मंगळसूत्रातील सोन्याचे मणी किंवा पेंडंट हे 'शक्ती'चे प्रतीक मानले जाते, तर काळे मणी हे 'भगवान शिव' यांचे प्रतीक मानले जातात. काळ्या मण्यांच्या माध्यमातून शिव आणि शक्तीची कृपा दांपत्यावर सदैव राहते, अशी श्रद्धा आहे.

शनी ग्रहाचा प्रभाव: अंकशास्त्र आणि ज्योतिषानुसार, काळा रंग हा 'शनी' ग्रहाशी संबंधित आहे. शनी हा शिस्त आणि स्थैर्याचा कारक आहे. मंगळसूत्रातील काळे मणी वैवाहिक जीवनात स्थिरता आणतात आणि पती-पत्नीमधील नाते अधिक घट्ट करण्यास मदत करतात, असे मानले जाते.

वातावरणातील नकारात्मकता दूर करणे: शास्त्रीय दृष्टिकोनातून पाहिले तर, काळा रंग उष्णता आणि लहरी शोषून घेतो. जेव्हा स्त्री मंगळसूत्र परिधान करते, तेव्हा त्यातील काळे मणी तिच्या सभोवतालची नकारात्मक स्पंदने शोषून घेतात, ज्यामुळे तिचे मन शांत राहते आणि घरात सकारात्मकता टिकून राहते.

पाच तत्त्वांचे संतुलन: असे मानले जाते की, मंगळसूत्रातील काळे मणी पृथ्वी, जल, अग्नी, वायू आणि आकाश या पाच तत्वांना संतुलित ठेवण्याचे काम करतात. सोन्याच्या तारांमध्ये गुंफलेले हे मणी स्त्रीच्या हृदयाच्या जवळ असतात, ज्यामुळे तिच्या ऊर्जेत वाढ होते.

परंपरेचे पावित्र्य: संस्कृतमध्ये 'मंगळ' म्हणजे पवित्र आणि 'सूत्र' म्हणजे धागा. हा पवित्र धागा केवळ सौंदर्यासाठी नसून तो पतीच्या दीर्घायुष्यासाठी आणि कल्याणासाठी असतो. काळ्या मण्यांमुळे या पवित्र धाग्याची शक्ती द्विगुणित होते, असे मानले जाते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)