T20 World Cup : वनडे वर्ल्ड कपचे 2 खेळाडू पुन्हा फायनलमध्ये, अहमदाबादमध्येच विराट-रोहितचं अधूरं स्वप्न पूर्ण करणार!

सेमी फायनलमध्ये इंग्लंडचा पराभव केल्यानंतर टीम इंडियाने लागोपाठ दुसऱ्यांदा टी-20 वर्ल्ड कपच्या फायनलमध्ये धडक मारली आहे. फायनलमध्ये टीम इंडियाचा सामना न्यूझीलंडविरुद्ध होणार आहे.

भारत आणि न्यूझीलंड यांच्यात रविवार 8 मार्चला टी-20 वर्ल्ड कपची फायनल होणार आहे. याआधी 2023 वनडे वर्ल्ड कपची फायनलही अहमदाबादमध्येच झाली होती, पण या सामन्याच्या कटू आठवणी आजही भारतीय क्रिकेट चाहत्यांना त्रास देतात.

2023 च्या वनडे वर्ल्ड कप फायनलमध्ये ऑस्ट्रेलियाविरुद्ध पराभव झाल्यानंतर टीम इंडियाचे खेळाडू मैदानात ढसाढसा रडले होते. ही वर्ल्ड कप फायनल खेळलेले दोन खेळाडू टी-20 वर्ल्ड कपची फायनलही खेळतील.

इशान किशन, हार्दिक पांड्या, सूर्यकुमार यादव, अक्षर पटेल, जसप्रीत बुमराह, मोहम्मद सिराज आणि कुलदीप यादव हे 7 खेळाडू 2023 वनडे वर्ल्ड कपच्या भारतीय टीममध्ये होते, जे आता भारताच्या टी-20 वर्ल्ड कप टीमचाही भाग आहेत.

वनडे वर्ल्ड कपची फायनल खेळलेले दोन जणच अहमदाबादमध्ये टी-20 वर्ल्ड कप फायनलच्या प्लेइंग इलेव्हनमध्ये असतील. बुमराह आणि सूर्यकुमार यादव हे वनडे वर्ल्ड कपची फायनल खेळले होते. सूर्याने वनडे वर्ल्ड कप फायनलमध्ये 28 बॉल 18 रन केले होते, तर बुमराहने 9 ओव्हरमध्ये 43 रन देऊन 2 विकेट घेतल्या होत्या.

सध्या टीम इंडियाचा भाग असलेले मोहम्मद सिराज, कुलदीप यादव हे 2023 वनडे वर्ल्ड कपची फायनल खेळले होते, पण आता टी-20 वर्ल्ड कप फायनलच्या प्लेइंग इलेव्हनमध्ये या दोघांना संधी मिळण्याची शक्यता कमी आहे.