जे कुणाला जमलं नाही, ते इराणने करून दाखवलं, सर्वात अवघड चक्रव्यूह भेदल, अमेरिका-इस्रायल हादरलं

जगातील सर्वात प्रगत तंत्रज्ञान, अमेरिकेची साथ आणि ७ पदरी अभेद्य सुरक्षा कवच... ज्या इस्रायलच्या दिशेनं पाहायची कुणाची हिंमत होत नव्हती, त्या इस्रायलचं अभेद्य चक्रव्यूह इराणने आज पहाटे चक्काचूर करून दाखवलं. 'ऑपरेशन ट्रू प्रॉमिस ४' अंतर्गत इराणने डागलेल्या क्षेपणास्त्रांनी केवळ इस्रायलच्या जमिनीलाच नाही, तर त्यांच्या 'सुपरपॉवर' असण्याच्या गर्वालाही तडा दिला.

इस्रायलकडे 'आयरन डोम'पासून ते 'अ‍ॅरो-३' पर्यंत जगातील सर्वोत्तम ७ थरांचे एअर डिफेन्स आहे. कोणत्याही क्षेपणास्त्राला हवेतच नष्ट करण्याची ताकद या यंत्रणेत असल्याचा दावा केला जातो. मात्र, इराणच्या 'खोर्रमशहर-४' (खैबर) या मिसाइलने हे सर्व दावे फोल ठरवले.

ताशी १९ हजार किलोमीटरपेक्षा जास्त वेगाने आलेल्या या क्षेपणास्त्रांनी इस्रायलच्या रडारला चकवा दिला आणि थेट 'बेंजामिन नेतान्याहू' यांच्या सत्ताकेंद्रावर म्हणजेच तेल अवीवच्या काळजावरच वार केला. इराणने हा हल्ला केवळ ताकदीने नाही, तर बुद्धीनं केला. त्यांनी एकाच वेळी शेकडो ड्रोन सोडले, जेणेकरून इस्रायलची यंत्रणा त्या ड्रोनला पाडण्यात गुंतून राहील.

नेमकी हीच वेळ साधून इराणने १ टन वजनाचे 'हाय एक्सप्लोसिव्ह' वारहेड असलेली क्षेपणास्त्रे डागली. ज्या चक्रव्यूहाला भेदणं रशिया किंवा चीनसारख्या देशांनाही कठीण वाटत होतं, ते इराणने अवघ्या १५ मिनिटांच्या तयारीत करून दाखवलं.

इराणने केवळ इस्रायललाच नाही, तर त्यांना वाचवायला आलेल्या अमेरिकेलाही मोठा धक्का दिला. बहरीन आणि कुवैतमधील अमेरिकेच्या २० तळांवर इराणने असा काही मारा केला की, तिथले सैनिक जीव वाचवण्यासाठी तळावरून पळून शहरातल्या हॉटेल्समध्ये लपल्याचा दावा इराणने केला आहे.

अमेरिकेसारख्या महासत्तेला आपल्या सैनिकांच्या रक्षणासाठी 'मानवी ढाल' वापरावी लागणं, हा इराणचा मोठा राजनैतिक आणि लष्करी विजय मानला जात आहे. ध्वनीपेक्षा कित्येक पटीने जास्त वेगाने प्रवास करण्याची क्षमता. २००० किमी दूर असूनही केवळ ३० मीटरच्या फरकाने अचूक टार्गेट उडवण्याची ताकद. एकाच वेळी ८० वेगवेगळ्या लक्ष्यांवर मारा करण्याची क्षमता.

इराणच्या या हल्ल्याने मध्यपूर्वेतील युद्धाचे चित्र पूर्णपणे बदलले आहे. आतापर्यंत 'बचावात्मक' पवित्र्यात असलेला इराण आता 'आक्रमक' झाला असून, त्यांनी जगाला दाखवून दिलंय की, कितीही मोठं चक्रव्यूह असलं तरी ते भेदण्याची जिद्द त्यांच्यात आहे.