Anti Valentine Slap Day : असं रेस्टॉरंट जिथं 'थप्पड' खायला येतात लोक, यासाठी पैसेही देतात

व्हॅलेंटाईननंतर सुरू होतो तो अँटी व्हॅलेंटाईन वीक. या आठवड्याचा पहिला दिवस स्लॅप डे. जो 15 फेब्रुवारीला साजरा केला जातो. एखाद्या व्यक्तीबद्दल तुमच्या मनात ज्या चुकीच्या भावना असतील त्यांना स्लॅप करण्यासाठीचा म्हणजे थोबाडीत मारण्याचा हा दिवस. थोबाडीत मारणं म्हणजे ते वाईट विचार काढून टाकणं. तुम्ही तुमच्या स्वभावातील नकारात्मक गोष्टीही काढून टाकायला या दिवशी सुरुवात करू शकता. 

स्लॅप डेच्या निमित्ताने आम्ही तुम्हाला एका अशा रेस्टॉरंटबाबत सांगणार आहोत, जिथं ग्राहक खास थप्पड खाण्यासाठी येतात. हे रेस्टॉरंट जपानमध्ये आहे, ज्याचा व्हिडीओही सोशल मीडियावर व्हायरल झाला होता. व्हिडीओमध्ये एक जपानी वेट्रेस रेस्टॉरंटच्या ग्राहकांना कानशिलात मारताना दिसत आहे. हा व्हिडीओ पाहून अनेक लोक हैराण झाले.

वेटरेसनं येणाऱ्या ग्राहकांशी प्रेमाने बोलणं आणि त्यांना लागणाऱ्या वस्तू आणून देणं अपेक्षित होतं, पण या महिलेने तर भलताच प्रकार केला. याच कारणामुळे हा व्हिडीओ सोशल मीडियावर जोरदार चर्चत आला आहे.

जपानमधील नागोया येथे असलेले शचिहोकोऱ्या रेस्टॉरंट ग्राहकांना जेवण देण्यापूर्वी स्वेच्छेने त्यांच्या तोंडावर चापट मारत असल्याचे या व्हिडीओतून समोर आलं आहे.

या रेस्टॉरंटमध्ये, किमोनोमधील वेट्रेस 300 JPY (रु. 170) साठी इच्छुक ग्राहकाच्या गालावर वारंवार कानशिलात मारते.

ग्राहकांनी एखाद्या विशिष्ट स्टाफ सदस्याला थप्पड मारण्याची विनंती केल्यास, ते अतिरिक्त 500 येन (रु. 283) देऊनही या सेवेचा लाभ घेऊ शकतात.

जपानी रेस्टॉरंटची ही सेवा जपानी पुरुष आणि महिला तसेच परदेशी पर्यटकांमध्ये खूप लोकप्रिय आहे.