चीनमध्ये बसल्या बसल्या डॉक्टरने मुंबईतल्या रुग्णाची केली सर्जरी, भारतात पहिल्यांदाच झाली अशी सर्जरी

कोणत्याही रुग्णाचं ऑपरेशन करायचं म्हणजे डॉक्टर तिथे पाहिजे. पण तुम्हाला आश्चर्य वाटेल एक डॉक्टर जो 5000 किलोमीटर दूर आहे तिथूनच त्याने रुग्णाची सर्जरी केली आहे. हे चमत्कारिक ऑपरेशन दुसरं तिसरं कुठे नाही तर मुंबईत झालं आहे. भारतातील हे असं पहिलंच प्रकरण असल्याचं सांगितलं जातं आहे.

मुंबईतील अंधेरी येथील कोकिलाबेन धीरूभाई अंबानी रुग्णालयात ही शस्त्रक्रिया पार पडली आहे. चीनमधील शांघाय येथील सर्जनने ही शस्त्रक्रिया केली. त्यांनी रुग्णांवर रॅडिकल प्रोस्टेटेक्टॉमी आणि आंशिक नेफरेक्टॉमी केली. हा विज्ञानाचा आणखी एक चमत्कार आहे. आता हे कसं शक्य झालं? असा प्रश्न तुम्हालाही पडला असेल.

"हे शक्य झालं ते टुमाई रिमोट रोबोटिक सर्जरी सिस्टीमनमुळे. ही एक अत्याधुनिक रिमोट रोबोटिक सर्जरी आहे, ज्यामुळे डॉक्टरांना हजारो किलोमीटर अंतरावरून जटिल शस्त्रक्रिया करता येते. हे 3D HD व्हिज्युअलायझेशन आणि 5G/ब्रॉडबँड सारख्या तंत्रज्ञानाचा वापर करतं, ज्यामुळे शस्त्रक्रियेचा वेळ कमी होतो आणि रुग्णांना जलद बरं होण्यास मदत होते.

हे ऑपरेशन अत्याधुनिक डेटा ट्रान्समिशन तंत्रज्ञानावर आधारित होतं, ज्यामध्ये फक्त 132 मिलिसेकंदांचा विलंब झाला. रुग्णालयाने दावा केला की ही भारतातील पहिली आंतरराष्ट्रीय स्तरावर मान्यताप्राप्त रिमोट रोबोटिक शस्त्रक्रिया आहे.

ही शस्त्रक्रिया करणारे डॉक्टर टी.बी. युवराज जे कोकिलाबेन हॉस्पिटलमधील युरो-ऑन्कोलॉजी आणि रोबोटिक सर्जरीचे संचालक आहेत. ते म्हणआले, रिमोट रोबोटिक सर्जरीमध्ये उच्च दर्जाच्या शस्त्रक्रियेची क्षमता आहे. दोन प्रमुख देशांमध्ये या प्रक्रिया यशस्वीरित्या पूर्ण केल्याने भारत आणि जगभरात जागतिक दर्जाचे उपचार प्रदान करण्यासाठी नवीन मार्ग खुले होतील. (सर्व फोटो : प्रतीकात्मक)