Pune News : पाईप लाईन दुरुस्तीसाठी आला अन् 7 कोटींचा चुना लावून गेला; पुण्यात नेमकं घडलं काय?

मिळालेल्या माहितीनुसार, पुण्यात सांडपाणी वाहिनी दुरुस्तीच्या बहाण्याने फसवणूकीचा प्रकार घडलेल्या आहे, ज्यात एका ज्येष्ठ नागरिकाची तब्बल 6 कोटी 70 लाख रुपयांची फसवणूक झाल्याची धक्कादायक घटना समोर आली आहे.

घडलेल्या या प्रकरणी विश्रामबाग पोलिस ठाणे यांनी एका कंत्राटदाराला अटक केली आहे. न्यायालयाने आरोपीला 28 फेब्रुवारीपर्यंत पोलिस कोठडी सुनावली आहे. संदीप उर्फ सोनू उर्फ आदित्य चव्हाण उर्फ ठाकूर (वय 40) असे अटक करण्यात आलेल्या आरोपीचे नाव आहे. तो मूळचा देहूरोड येथील असून सध्या कोथरूडमध्ये राहत होता. त्याच्यासह आणखी चार जणांविरोधात गुन्हा दाखल करण्यात आला आहे.

नारायण पेठेत राहणाऱ्या एका सेवानिवृत्त अधिकाऱ्याने याबाबत तक्रार दिली आहे. आरोपीने स्वतःला पुणे महानगरपालिका येथे सांडपाणी वाहिन्यांची कंत्राटी कामे करणारा ठेकेदार असल्याचे सांगितले. घराजवळील सांडपाणी लाईनमध्ये झाडांची मुळे शिरल्यामुळे नवीन लाईन टाकावी लागेल असे कारण देत त्याने पैशांची मागणी केली.