सायबर चोरट्यांनी गंडवलं, पण पोलिसांनी वाचवलं; बारामतीतील व्यक्तीने 1.30 कोटी गमवले, पण शेवटी मोठा 'ट्विस्ट'

फिर्यादीला एका व्हॉट्सअ‍ॅप ग्रुपमध्ये सामील करून सायबर चोरट्यांनी प्रथम त्यांचा विश्वास संपादन केला. त्यानंतर एका बनावट ट्रेडिंग अ‍ॅपद्वारे खाते उघडण्यास सांगून, त्यात फेक नफा दाखवण्यात आला. हा नफा पाहून फिर्यादीने वेळोवेळी मोठी रक्कम आरोपींनी सांगितलेल्या विविध बँक खात्यांमध्ये जमा केली. मात्र, जेव्हा ही रक्कम काढण्याची वेळ आली, तेव्हा फसवणूक झाल्याचे फिर्यादीच्या लक्षात आले.

तपासादरम्यान असे निष्पन्न झाले की, ही रक्कम प्रथम मध्यस्थ खात्यांमध्ये जमा केली जायची आणि त्यानंतर ती एटीएम, कॅश डिपॉझिट मशीन (CDM) आणि स्वाइप मशीनद्वारे इतर खात्यांत वर्ग केली जायची. पोलिसांनी मनी ट्रेल, डिजिटल पुरावे आणि एटीएम फुटेजचा आधार घेत या संघटित रॅकेटचा शोध लावला. दोन आरोपींच्या अटकेनंतर या प्रकरणाचे धागेदोरे मुख्य सूत्रधारांपर्यंत पोहोचण्याची शक्यता आहे.