पान खाल्ल्यानंतर येतेय गुंगी! मग तुम्हीही शिकार झालात का? पुण्यात 'कडक फुलचंद' पानाच्या नावाखाली ड्रग्जचा बाजार; नेमकं काय आहे प्रकरण?

लोणी काळभोर येथील 'मैफिल पान हाऊस'वर पोलिसांनी छापा टाकला असता, तिथे मिळणाऱ्या पांढऱ्या पावडरमध्ये अँफेटामाइन, बेंझोडायझेपाइन्स, ओपिएट्स आणि मेथॅम्फेटामाइन यांसारखी मानवी मेंदूवर घातक परिणाम करणारी द्रव्ये आढळली. याप्रकरणी आकुर्डी येथील कैलास मांढरे आणि अनुराधा मांढरे या दांपत्याला पोलिसांनी ताब्यात घेतले आहे. या पावडरची किंमत बाजारपेठेत 80  हजार रुपये प्रति किलो इतकी आहे.

तपासाची चक्रे फिरवत पोलिसांनी हिंजवडी जवळील जांबेगाव येथील 'चैतन्य फूड गोडाऊन'वर धाड टाकली. या ठिकाणी चक्क अशा नशिल्या भुकटीचे उत्पादन केले जात असल्याचे समोर आले. पोलिसांनी तिथून 6.63 लाख रुपयांचा मुद्देमाल, काळे द्रावण आणि एक कार जप्त केली आहे. दुसरीकडे, चिंचवडमधील वाल्हेकरवाडी येथील 'मंगलमूर्ती पान स्टॉल'वर छापा टाकून पोलिसांनी ज्ञानेश्वर नामदेव वानखेडे याला अटक केली असून त्याच्याकडून 710 ग्रॅम अंमली पदार्थ मिश्रित पावडर जप्त केली आहे.

अनेक नागरिकांनी पान खाल्ल्यानंतर प्रचंड गुंगी येत असल्याच्या तक्रारी पोलिसांकडे केल्या होत्या. याची गांभीर्याने दखल घेत पोलिसांनी 'पोर्टेबल ड्रग्ज टेस्टींग किट'चा वापर करून घटनास्थळीच पावडरीची तपासणी केली आणि हे रॅकेट उघडकीस आले. या भयंकर प्रकारामुळे पालकांमध्ये चिंतेचे वातावरण पसरले असून, पोलीस आता या रॅकेटचा मुख्य सूत्रधार कोण? याचा शोध घेत आहेत.

विद्येचं माहेरघर अशी बिरुदावली मिरवणारे पुणे गेल्या काही दिवसांत सातत्याने चर्चेत येत आहे. पुण्यात ड्रग्सचं आंतराष्ट्रीय रॅकेट उघड झाल्याने खळबळ उडाली होती. पुण्यातल्या तरुणाईला झालंय काय असा प्रश्न आता वारंवार उपस्थित राहत आहे. ललित पाटील ड्रग्ज रॅकेट, पोर्शे कार अपघात अशा प्रकरणांमुळे पुण्यातील ड्रग्ज रॅकेटचा हा खेळ सर्वांसमोर आला आहे. पुण्यातील तरुणाई आज अंमली पदार्थ आणि ड्रग्जच्या विळख्यात सापडल्याचे भीषण वास्तव आहे. रात्रभर पबमध्ये नशेत झिंगणाऱ्यांचे एक वेगळेच विश्व पुण्यात रात्री पाहायला मिळत असल्याने ही नक्कीच धोक्याची घंटा समजली जात आहे. वाढत्या बेरोजगारीमुळे तरुणांमध्ये व्यसनाधीनतेचे प्रमाणही वाढत आहे. पूर्वी अफीम, कोकेन, गांजा, चरस याच्या आहारी जाणाऱ्या तरुणांमध्ये आता नशेचा ट्रेंडदेखील बदलला आहे. आता कोकेन, मेफेड्रोन (एम.डी), एलएसडी स्टॅम्प, एमडीएमए, मशरूम आणि हशिश तेल याचा वापर नशेसाठी मोठ्या प्रमाणात केला जात आहे.