'दानपेटीतील दागिने-पैसे गायब; आलिशान गाड्याही..'; प्रसिद्ध मंदिरात कोट्यवधींचा घोटाळा, पुजाऱ्याच्या आरोपाने खळबळ

पुणे : लोणावळ्यातील प्रसिद्ध कार्ला गडावरील आई एकवीरा देवी देवस्थान ट्रस्टमध्ये कोट्यवधी रुपयांचा आर्थिक गैरव्यवहार झाल्याचा खळबळजनक आरोप करण्यात आला आहे. देवीचे पुजारी गणेश देशमुख यांनी एका पत्रकार परिषदेत ट्रस्टचे अध्यक्ष दीपक हुलावळे यांच्यावर भ्रष्टाचाराचे गंभीर आरोप करत देवस्थानच्या कारभारावर प्रश्नचिन्ह उपस्थित केले आहे. देशमुख यांच्या दाव्यानुसार, भाविकांनी श्रद्धेने अर्पण केलेले सोन्या-चांदीचे मौल्यवान दागिने आणि रोख रक्कम अध्यक्ष आणि संबंधित प्रशासनाकडून लंपास करण्यात आली असून ट्रस्टच्या मालमत्तेचा वापर वैयक्तिक कामासाठी केला जात आहे.