इंदापुरात थरारक पाठलाग! पोलिसांनी गाडी अडवली; प्लास्टिक ड्रम उघडताच खळबळ, सोलापूर आणि साताऱ्यापर्यंत धागेदोरे

हे तस्कर गोव्याहून कच्च्या स्वरूपात दारू आणत असत. पुण्यात आणल्यानंतर ती रॉयल स्टॅग आणि इम्पेरियल ब्ल्यू सारख्या नामवंत ब्रँडच्या रिकाम्या बाटल्यांमध्ये भरली जात असे. त्यावर हुबेहूब दिसणारी बनावट बुचे लावून ग्राहकांची फसवणूक केली जात होती. कांदलगाव-शहा रस्त्यावर सापळा रचून पोलिसांनी एका मालवाहू वाहनाला अडवले. त्यात मद्याने भरलेले २५ प्लास्टिक ड्रम आणि तब्बल १ हजार ४०० बनावट बुचे आढळून आली.

या कारवाईत पोलिसांनी प्रेम सोमनाथ भडवलकर (रा. बारामती) आणि अक्षय अधिकराव देशमुख (रा. सोलापूर) या दोघांना जागीच अटक केली. आरोपींच्या चौकशीतून मिळालेल्या माहितीनुसार, पोलिसांनी सोलापूरमधील माढा आणि सातारा जिल्ह्यातील महिमानगड येथे छापे टाकले. तिथे विदेशी दारूच्या बाटल्या, रिकाम्या बाटल्या आणि सुमारे २ हजार बनावट बुचे असा मोठा साठा सापडला. या संपूर्ण कारवाईत एकूण २० लाख ५३ हजार रुपयांचा मुद्देमाल जप्त करण्यात आला आहे.

एक्साईज विभागाच्या या धडक कारवाईमुळे आंतरजिल्हा मद्य तस्करीची एक मोठी साखळी उखडून टाकण्यात यश आले आहे. बनावट दारूमुळे नागरिकांच्या आरोग्याला धोका निर्माण होत असल्याने, अशा टोळ्यांविरुद्ध कडक मोहीम राबवली जात आहे.