PMPML bus service : काहीही करा पण बस गावातून येऊ द्या! नागरिकांसह विद्यार्थ्यांची प्रशासनाला आर्त हाक

वडगाव शहर हे मावळ तालुक्याचे मुख्यालय असून, येथून निगडी, कात्रजपर्यंत बससेवा अनेक वर्षांपासून चालू आहे. पूर्वी बस शहरातील मुख्य रस्त्यानेच जात होती. मात्र, मोठ्या प्रमाणावर अस्ताव्यस्त पार्किंग आणि सतत निर्माण होणाऱ्या वाहतूककोंडीमुळे बसला शहराच्या बाहेरून महामार्गावर मार्गक्रमण करावे लागले. या कारणामुळे शहरातील केशवनगर, म्हाळसकरवाडी, छत्रपती संभाजी महाराजनगर, खंडोबा मंदिर परिसर, ढोरेवाडा, चव्हाणवाडा यांसारखे रहिवासी भाग महामार्गापासून लांब असल्याने नागरिकांना बस मिळवण्यासाठी मोठे अंतर पार करावे लागते.

शहरातील या रहदारीच्या परिसरात मोठ्या संख्येने कामगारवर्ग वास्तव्यास असून विद्यार्थ्यांची संख्या सुद्धा मोठी आहे. त्यामुळे बससेवा महामार्गावर जाण्यामुळे नागरिकांना रोजच्या प्रवासात अडचणी येतात. मुख्य स्टॉप्स जसे की महादजी शिंदे स्मारकाजवळ, मातोश्री हॉस्पिटलजवळ किंवा स्वागत कमानीजवळ पोहोचण्यासाठी लोकांना पळत-पळत जावे लागते. उशिरा घरातून निघाल्यास वेळप्रसंगी बस पकडणे अगदी अवघड होते.