पुणे स्टेशनवर जाणाऱ्या प्रवाशांची गैरसोय; नांदेड एक्स्प्रेसचा प्रवास 'या' स्टेशनलाच थांबणार, रेल्वेचा मोठा निर्णय

‎नांदेड–पुणे एक्स्प्रेस पुण्याच्या मुख्य स्थानकापर्यंत न नेता ती हडपसरपर्यंतच चालवण्याचा निर्णय मध्य रेल्वेने घेतला आहे. हा बदल 26 जानेवारीपासून अमलात येणार असून ऑनलाइन आरक्षण व्यवस्थेतही त्यानुसार सुधारणा करण्यात आली आहे. त्यामुळे मराठवाड्यातील प्रवाशांना नव्या वर्षात हडपसरपर्यंत उतरून पुढे पुणे शहर गाठण्याची अतिरिक्त कसरत करावी लागणार आहे. हा निर्णय नोव्हेंबरमध्ये जाहीर झाला होता; मात्र महापालिका निवडणुकीच्या रणधुमाळीत लोकप्रतिनिधींनी याकडे दुर्लक्ष केल्याची तीव्र नाराजी प्रवाशांतून व्यक्त होत आहे.