प्रवाशांनो जरा जपून! ट्रेनमधून उतरताना चिरडले गेले दोन्ही पाय, 18 वर्षीय तरुणासोबत घडली भयंकर दुर्घटना

अपघाताचा थरार आणि प्रशासनाची उदासीनता: मिळालेल्या माहितीनुसार, सोमेश्वरनगर (ता. बारामती) येथील आदित्य साहेबराव होळकर हा तरुण सोमवारी संध्याकाळी नीरा रेल्वे स्थानकात उतरत होता. यावेळी त्याचा पाय घसरला आणि तो थेट रुळाखाली गेला. या भीषण दुर्घटनेत त्याचे दोन्ही पाय निकामी झाले. अपघात झाल्यानंतर मदतीसाठी रेल्वे पोलीस, आरपीएफ किंवा स्टेशन कर्मचारी तत्काळ पुढे आले नाहीत, असा गंभीर आरोप प्रत्यक्षदर्शींनी केला आहे. धक्कादायक बाब म्हणजे, रेल्वे स्थानकातील पोलीस मदत केंद्रालाही कुलूप असल्याचे यावेळी दिसून आले.

प्रशासनाकडून मदत मिळत नसल्याचे पाहून स्थानिक तरुणांनी पुढाकार घेतला. प्रहार संघटनेच्या रुग्णवाहिकेतून जखमी आदित्यला तातडीने लोणंद आणि त्यानंतर जेजुरी येथील ग्रामीण रुग्णालयात हलवण्यात आले. प्रकृती चिंताजनक असल्याने त्याला पुढील उपचारासाठी पुण्यातील संचेती रुग्णालयात दाखल करण्यात आले आहे. सध्या या तरुणावर उपचार सुरू आहेत.