सायंकाळची वेळ, आळंदीचा तो रस्ता अन् सार्वजनिक ठिकाणीच तिचं नको ते कृत्य; पोलिसांनी घडवली महिलेला अद्दल

दिघी-आळंदी रस्त्यावर गेल्या काही दिवसांपासून काही महिला सार्वजनिक ठिकाणी उभ्या राहून वाटसरूंना अश्लील इशाऱ्यांद्वारे अडवत असल्याच्या तक्रारी प्राप्त होत होत्या. मंगळवारी सायंकाळी पिंपरी-चिंचवड गुन्हे शाखेच्या 'अनैतिक मानवी वाहतूक प्रतिबंधक कक्षा'ने (AHTU) या परिसरात सापळा रचला. यावेळी चऱ्होली येथील एक ४३ वर्षीय महिला रस्त्यावरून जाणाऱ्या लोकांना अडवून वेश्या व्यवसायासाठी खुणावत असल्याचे पोलिसांच्या निदर्शनास आले.

संबंधित महिलेच्या या कृत्यामुळे सार्वजनिक शांततेचा भंग होत असल्याने आणि वाहतुकीला अडथळा निर्माण होत असल्याने पोलिसांनी गुन्हा दाखल केला आहे. या प्रकरणी पोलीस अंमलदार गणेश सीताराम कारोटे यांनी दिघी पोलीस ठाण्यात फिर्याद दिली आहे. पोलिसांनी या ४३ वर्षीय महिलेविरुद्ध भारतीय न्याय संहितेच्या संबंधित कलमान्वये गुन्हा दाखल केला आहे.