पुण्यातील अल्पवयीन मुलीला पळवलं, 5 महिन्यांपासून पोलिसांना गुंगारा..., अखेर त्या इन्स्टा स्टोरीमुळे सापडला आरोपी

इन्स्टाग्राम स्टोरीमधून मिळालेल्या माहितीनुसार पोलिसांनी सापळा रचून बेपत्ता असलेल्या 15 वर्षीय मुलीचा शोध लावला. मुलगी बेपत्ता झाल्यानंतर वर्धा, गोंदिया आणि नागपूर ग्रामीण भागातही पोलिसांनी तिचा शोध घेतला, पण सुरुवातीला ठोस माहिती मिळाली नव्हती. आरोपी मयूर रमेश वघरे इंस्टाग्रामचा वापर करत होता आणि या सोशल मीडिया माध्यमामुळे पोलिसांना त्याचा शोध घेण्यात यश आले. या कारवाईत वाठोडा पोलीस ठाण्याच्या पथकाने मयूरला अटक केली असून न्यायालयाने त्याला दोन दिवसांची पोलीस कोठडी सुनावली आहे. आरोपी गोंदिया जिल्ह्यातील गोरेगाव तालुक्यातील म्हसगाव येथील रहिवासी आहे.

आरोपीने तीन दिवसांपूर्वी आपल्या मित्राला वाढदिवसाच्या शुभेच्छा देत इन्स्टाग्रामवर स्टोरी पोस्ट केली होती. यावरून पोलिसांना त्याचा मागोवा घेता आला आणि आरोपीच्या मित्राशी संपर्क साधला. पोलिसांनी आरोपीला पकडण्यासाठी एक सापळा रचला. या कारवाईसाठी पोलिसांचे पथक पुण्यातही रवाना झाले होते. पोलिसांनी एका महिला कर्मचाऱ्याला आरोपीच्या मित्राच्या मैत्रिणीची भूमिका निभावण्यासाठी सांगितले. त्यानंतर आरोपीला पुणे बसस्थानकावर 12 तास वाट पाहायला लावले. त्यानंतर बारामती येथे येण्यास सांगितले, जिथे तो 6 तास थांबला. अखेरीस भवानीनगर बस स्टॉप, इंदापूर येथे आरोपीला बोलावले. इंस्टाग्रामवर व्हिडिओ कॉल करून खात्री केल्यानंतर पोलिसांनी त्याला तिथे अटक केली.