पुणेकरांनो, विकेंडला फिरण्याची सोय झाली; PMPची नवी बससेवा, स्वस्तात पाहा ही ऐतिहासिक अन् निसर्गरम्य ठिकाणं

पुणे : पर्यटनाला चालना देण्यासाठी पीएमपीएमएलकडून एक महत्त्वपूर्ण निर्णय घेण्यात आला आहे. पीएमपीएमएलकडून मोराची चिंचोली आणि पाबळ या पर्यटनस्थळांसाठी नवीन बस सेवा सुरू करण्यात आली आहे. मोराची चिंचोली हे पुणे–अहमदनगर महामार्गावर शिरूरजवळ वसलेले गाव आहे. अहमदनगर मार्गावरून शिक्रापूर फाट्यावर डाव्या बाजूने आत वळल्यास हे गाव लागते.नावाप्रमाणेच मोरांची मोठी वस्ती आणि चिंचेच्या झाडांनी वेढलेले हे गाव पर्यटकांचे विशेष आकर्षण ठरले आहे. गावात मोठ्या प्रमाणावर मोर आढळून येतात. त्यामुळे या गावाला मोराची चिंचोली असे नाव पडले. निसर्गरम्य वातावरणामुळे राज्यासह देशातील अनेक पर्यटक या गावाला भेट देत असतात.