रूमाल बांधून चौघं आले अन्.. अल्पवयीन मुलासोबत धक्कादायक घडलं; पुण्यातील वर्दळीच्या सिंहगड रस्त्यावर थरार

मिळालेल्या माहितीनुसार, शनिवारी सायंकाळी साडेचार ते पाचच्या सुमारास हा अल्पवयीन मुलगा माणिकबाग येथील 'बर्गर किंग' दुकानासमोर उभा होता. त्याच वेळी दोन दुचाकींवरून चार तरुण तेथे आले. ओळख पटू नये म्हणून त्यांनी तोंडाला रुमाल बांधले होते. काहीही विचारण्यापूर्वीच त्यांनी या मुलावर धारदार शस्त्राने सपासप वार केले. रक्ताच्या थारोळ्यात पडलेल्या मुलाला सोडून हल्लेखोर क्षणात पसार झाले.

सिंहगड रस्ता परिसरात नेहमीच मोठी वर्दळ असते. अशा ठिकाणी दिवसाढवळ्या झालेल्या या हल्ल्याने नागरिकांमध्ये भीतीचे वातावरण आहे. जखमी मुलाला तातडीने जवळच्या रुग्णालयात दाखल करण्यात आले असून, त्याची प्रकृती सध्या चिंताजनक असल्याचे वैद्यकीय सूत्रांनी सांगितले.

घटनेची माहिती मिळताच सिंहगड रस्ता पोलीस ठाण्याच्या पथकाने घटनास्थळी धाव घेतली. पोलिसांनी परिसरातील सीसीटीव्ही फुटेज ताब्यात घेतले असून, त्यावरून आरोपींची ओळख पटवण्याचे काम सुरू आहे. हा हल्ला पूर्ववैमनस्यातून झाला की अन्य काही कारणास्तव, हे अद्याप स्पष्ट झालेले नाही. या प्रकरणी गुन्हा दाखल करण्याची प्रक्रिया सुरू असून पोलीस तपासाला वेग आला आहे.