पुण्यात चाललंय काय? बुलेटच्या कर्णकर्कश हॉर्नला विरोध करणं पडलं महागात; ज्येष्ठासोबत टोळक्याचं धक्कादायक कृत्य

तक्रारदार ज्येष्ठ नागरिक हे महर्षीनगरमधील एका सोसायटीत वास्तव्यास आहेत. १७ फेब्रुवारी रोजी दुपारी साडेचारच्या सुमारास एक आरोपी आपल्या बुलेटवरून सोसायटीच्या आवारात आला. त्याने विनाकारण बुलेटचा कानठळ्या बसवणारा हॉर्न वाजवण्यास सुरुवात केली. या आवाजाचा त्रास झाल्याने ज्येष्ठाने त्याला विचारणा केली. याचा राग मनात धरून आरोपीने सुरुवातीला शिवीगाळ केली आणि नंतर आपल्या साथीदारांना बोलावून घेतले. या टोळक्याने ज्येष्ठ नागरिकावर बॅटने हल्ला चढवला आणि त्यांना शारीरिक इजा केली.