पुणे हादरलं! आईनं आपल्या मित्रासोबत लेकीला शाळेत पाठवलं; वारजेतील 'त्या' निर्मनुष्य रस्त्यावर नेत त्यानं केलं धक्कादायक कांड

पीडित मुलीची आई विधवा असून, ती आणि आरोपी ज्ञानेश्वर हे मागील अनेक वर्षांपासून एकमेकांचे मित्र होते. ओळखीमुळे आईचा ज्ञानेश्वरवर पूर्ण विश्वास होता. गुरुवारी सकाळी मुलीने ज्ञानेश्वरला शाळेत सोडण्यासाठी बोलावले. आईनेही विश्वासाने लेकीला त्याच्यासोबत पाठवले. मात्र, नराधम ज्ञानेश्वरने तिला शाळेत न नेता वारजे येथील डीपी रोडवर नेले. निर्मनुष्य ठिकाणी गाडी थांबवून त्याने चिमुकलीवर लैंगिक अत्याचार केला.

मुलीची शाळा सकाळी ७ वाजता होती, मात्र ती साडेसात वाजता पोहोचली. घरी आल्यावर आईने तिला या अर्ध्या तासाच्या विलंबाबाबत विचारणा केली. आईने विचारताच मुलगी प्रचंड घाबरली आणि तिची अवस्था पाहून आईचा संशय बळावला. अखेर विश्वासात घेऊन विचारल्यावर मुलीने आपल्यासोबत घडलेला विदारक प्रसंग सांगितला. आईने क्षणाचाही विलंब न लावता वारजे पोलीस ठाणे गाठून फिर्याद दिली.

वारजे पोलिसांनी घटनेचे गांभीर्य ओळखून तातडीने तपास चक्रे फिरवली आणि आरोपी ज्ञानेश्वर रायरीकर याला अटक केली. या घटनेमुळे परिसरात तीव्र संताप व्यक्त होत असून, ओळखीच्याच व्यक्तींकडून होणाऱ्या अशा कृत्यांमुळे पालकांमध्ये भीतीचे वातावरण आहे.