पुण्याच्या FC रोडवर रक्तरंजित थरार, मुंबईच्या आदित्यनं उचललं टोकाचं पाऊल, भरगर्दीत घडला भयंकर प्रकार!

आदित्य सातपुते (वय ४१) असं या तरुणाचं नाव असून तो मूळचा मुंबईतील बोरिवली येथील रहिवासी आहे. सध्या तो पुण्यातील भोसले नगर भागात वास्तव्यास होता. मिळालेल्या माहितीनुसार, आदित्यची काही दिवसांपूर्वी नोकरी गेली होती, ज्यामुळे तो प्रचंड मानसिक तणावाखाली होता. शनिवारी रात्री जेव्हा एफसी रोडवर तरुणाईची मोठी गर्दी असते, तेव्हा अचानक आदित्यने स्वतःच्या गळ्यावर ब्लेडने गंभीर वार केले.

भररस्त्यात घडलेल्या या रक्तरंजित प्रकारामुळे परिसरात एकच पळापळ आणि घबराट निर्माण झाली. खाऊ गल्लीतील दुकानदार आणि नागरिक या घटनेने पुरते हादरून गेले होते. घटनेचं गांभीर्य ओळखून आजूबाजूला असलेल्या सजग नागरिकांनी तात्काळ धाव घेत आदित्यला मदत केली. त्याला तातडीने जवळच्या एका खासगी रुग्णालयात दाखल केलं. वेळीच उपचार मिळाल्याने त्याचे प्राण वाचले असून सध्या त्याच्यावर डॉक्टरांच्या देखरेखीखाली उपचार सुरू आहेत. घटनेची माहिती मिळताच पोलिसांनी रुग्णालय आणि घटनास्थळी धाव घेऊन पंचनामा केला.

पोलिसांनी दिलेल्या प्राथमिक माहितीनुसार, नोकरी गेल्यामुळे आदित्य गेल्या काही दिवसांपासून नैराश्यात होता. याच नैराश्यातून त्यांनी स्वतःला संपवण्याचा प्रयत्न केला. मात्र, या घटनेमागे नोकरीव्यतिरिक्त इतर काही कौटुंबिक किंवा वैयक्तिक कारणं आहेत का, याचा तपास आता पोलीस करत आहेत.