ते पान खाताच ग्राहक 'बेशुद्ध'; तपासात पुण्यातील 'मोठं कांड' उघड, कारखान्यावर छापा टाकताच पोलिसांचेही डोळे विस्फारले

गेल्या काही दिवसांपासून पिंपरी-चिंचवड आणि पुणे शहरातील पानटपऱ्यांवर 'कडक' आणि 'फूलचंद' नावाच्या पानांची मागणी वाढली होती. ग्राहकांना आकर्षित करण्यासाठी आणि पानाची 'किक' वाढवण्यासाठी काही विक्रेते चक्क अमली पदार्थांच्या पावडरचा वापर करत असल्याचे तपासात उघड झाले आहे. या घातक पावडरची किंमत सुमारे दोन हजार रुपये प्रति ग्रॅम असून, ती काथ किंवा तंबाखूमध्ये मिसळून ग्राहकांना दिली जात होती.

या प्रकरणाचा छडा लावण्यासाठी पिंपरी-चिंचवड गुन्हे शाखेच्या अंमली पदार्थ विरोधी पथकाने तपास सुरू केला असता, याचे धागेदोरे मुळशी तालुक्यातील जांबे गावापर्यंत पोहोचले. तिथे या नशेच्या पावडरची निर्मिती करणारा कारखानाच पोलिसांनी शोधून काढला. हिंजवडी पोलीस ठाण्यात याप्रकरणी गुन्हा दाखल करण्यात आला असून, वाल्हेकरवाडीतील एका पानटपरीवरही पोलिसांनी छापेमारी करून साठा जप्त केला आहे.

जप्त केलेल्या पावडरच्या प्राथमिक तपासात ओपिएट्स, बेन्झोडायझेपीन आणि मेथाम्फेटामाइन यांसारख्या अतिशय घातक ड्रग्जचा अंश आढळला आहे. हे पदार्थ थेट मानवी मेंदूवर परिणाम करतात, ज्यामुळे व्यक्तीला तात्काळ गुंगी किंवा नशा चढते. याचे सतत सेवन केल्यास मानसिक अस्थिरता आणि गंभीर आजार होऊ शकतात.