धक्कादायक! शेअर मार्केटमध्ये तोटा अन् सूड सुनेवर उगवला; ती घरात येताच पुण्यातील सासऱ्याने बेल्ट काढला अन्...

पीडित महिलेचा विवाह २४ नोव्हेंबर २०२४ रोजी झाला होता. मात्र, संसार सुरळित सुरू होण्याआधीच सासरच्या मंडळींनी तिचे जगणे असह्य केले. पती राजदीप, सासरे प्रदीप आणि सासू हेमलता यांनी क्षुल्लक कारणांवरून तिला शारीरिक आणि मानसिक त्रास देण्यास सुरुवात केली. विशेष म्हणजे, तिला घरात उपाशी ठेवण्याचेही क्रूर प्रकार घडले.

सासरच्या मंडळींना शेअर मार्केटमध्ये मोठ्या प्रमाणावर तोटा झाला होता. हा तोटा भरून काढण्यासाठी त्यांनी पीडितेच्या वडिलांकडे ५ लाख रुपयांची मागणी केली. छळाला कंटाळून पीडितेने वडिलांकडून ३ लाख रुपये आणून दिले, तरीही सासरच्यांची पैशांची हाव संपली नाही. दिवाळीत पुन्हा पैशांची मागणी करत तिला माहेरी पाठवून देण्यात आले.

२१ डिसेंबर २०२५ रोजी जेव्हा पीडिता पुन्हा सासरी आली, तेव्हा तिला घरात घेण्यास नकार देण्यात आला. "पैसे आणले असतील तरच घरात ये," अशी धमकी देत सासरच्यांनी तिला प्रवेश नाकारला. यावेळी झालेल्या वादात सासऱ्याने तिला बेल्टने अमानुषपणे मारहाण केली, तर पतीने लाथाबुक्क्यांनी मारले. सासूनेही या मारहाणीत साथ दिल्याचे तक्रारीत म्हटले आहे.