सिग्नलवर यायचे, कारच्या काचेवर टक-टक वाजवायचे अन् मग क्षणात मोठं कांड; त्या घटनांनी पुण्यात खळबळ, अखेर दोघांना बेड्या

ही गँग अतिशय शिताफीने काम करते. सिग्नलवर किंवा गर्दीच्या ठिकाणी ही टोळी चारचाकी वाहनांना मागून धडक देते. यानंतर गाडीच्या काचेवर 'टक-टक' करून चालकाचे लक्ष विचलित करते. चालक काय झाले हे पाहण्यासाठी गाडीतून खाली उतरताच किंवा काच खाली करताच, संधी साधून गाडीतील मोबाईल, लॅपटॉप, बॅगा आणि रोख रकमेवर ही टोळी डल्ला मारते.

फरासखाना पोलीस ठाण्यातील गुन्ह्यांचा तपास करत असताना गुन्हे शाखा युनिट-१ च्या पथकाला सीसीटीव्ही फुटेजमधून दोन संशयित आरोपी दिसले. पोलीस कर्मचारी मयूर भोसले, अमित जमदाडे आणि हेमंत पेरणे यांना मिळालेल्या गुप्त माहितीनुसार, हे आरोपी समर्थ पोलीस ठाणे हद्दीतील एका लॉजवर येणार होते. पोलीस निरीक्षक अजित जाधव यांच्या मार्गदर्शनाखाली पोलिसांनी त्वरित सापळा रचला आणि रवी ओमप्रकाश कोहली (३८) व अफजल कय्युम अब्बासी (३८) या उत्तर प्रदेशातील (मेरठ) मूळ रहिवासी असलेल्या दोघांना जेरबंद केले.