पुणेकरांनो! 'थर्टी फर्स्ट'ला नशेत गाडी चालवण्याचा विचारही करू नका; RTO नं आधीच उचललं हे मोठं पाऊल

कठोर कारवाईचा इशारा: या मोहिमेचे सर्वात महत्त्वाचे वैशिष्ट्य म्हणजे, जर एखादा चालक मद्यधुंद अवस्थेत गाडी चालवताना आढळला, तर केवळ दंड आकारला जाणार नाही. तर त्याचे वाहन चालक परवाना थेट निलंबित करण्याची प्रक्रिया आरटीओकडून राबवली जाणार आहे. शहरातील मुख्य चौक, महामार्ग आणि शहराबाहेरील ढाबे, हॉटेल्स आणि रिसॉर्ट्सच्या परिसरातील रस्त्यांवर ही पथके 'ब्रेथ ॲनालायझर' मशीनसह सज्ज असणार आहेत.

नववर्षाच्या सेलिब्रेशनसाठी नागरिक मोठ्या संख्येने घराबाहेर पडतात. मद्याच्या नशेत वेगवान गाडी चालवल्यामुळे अनेकदा गंभीर अपघात होतात. हे टाळण्यासाठी आरटीओची ही पथके रात्रभर गस्त घालणार आहेत. उप प्रादेशिक परिवहन अधिकारी स्वप्नील भोसले यांनी स्पष्ट केले आहे की, रस्ता सुरक्षितता ही आमची सर्वोच्च प्राथमिकता असून नियम मोडणाऱ्यांची गय केली जाणार नाही.