पुण्यातला डोंगराळ भाग, रात्रीची वेळ अन् ते हिरव्या रंगाचं प्लॅस्टिक कॅन; उघडताच पोलीसही चक्रावले

मिळालेली पहिली माहिती अत्यंत धक्कादायक होती. वेल्हे तालुक्यातील आंबवणे गावाच्या हद्दीत, निर्जन डोंगराळ भागात बेकायदेशीरपणे गावठी हातभट्टीची दारू विक्री होत असल्याची खबर पोलिसांना मिळाली. सहाय्यक पोलीस निरीक्षक किशोर शेवते यांच्या मार्गदर्शनाखाली हवालदार आकाश पाटील यांच्या पथकाने रात्रीच्या अंधारात डोंगराळ भागात छापा टाकला. यावेळी पोलिसांना हिरव्या रंगाचे एक प्लास्टिक कॅन सापडले. ते उघडले असता त्यात सुमारे साडेआठ लिटर तयार गावठी दारू मिळून आली. या प्रकरणी सुरेश राजाराम इंगुळकर (रा. अडवली) याच्यावर गुन्हा दाखल करण्यात आला आहे.

दुसरी कारवाई पानशेत परिसरातील रानवडी येथे करण्यात आली. येथे एका पोल्ट्री फार्मच्या शेडचा आडोसा घेऊन अवैध दारू विक्री सुरू होती. पुणे ग्रामीण स्थानिक गुन्हे शाखेने (LCB) या ठिकाणी धाड टाकून गणेश दत्तात्रय निवंगुणे (रा. आंबी, ता. हवेली) याला ताब्यात घेतले. या कारवाईत पोलिसांनी २० लिटर गावठी हातभट्टी जप्त केली आहे.