संतती प्राप्ती अन् ग्रह दोषातून मुक्ती, सोलापुरातील मंदिरात होते गर्दी, काय आहे आख्यायिका?

सोलापूर: राहू आणि केतू हे ग्रह मानवी आयुष्यावर परिणाम करणारे मानले जातात. सोलापुरातील बाळे येथील खंडोबा मंदिर प्रसिद्ध आहे. याच ठिकाणी केतूचे प्रसिद्ध मंदिर आहे. आपल्या विविध मागण्या घेऊन भाविक इथं नेहमीच गर्दी करत असतात. या मंदिरात दर्शन घेतल्याने ग्रहदशा बदलते व संकटांचं निराकरण होतं, अशी भक्तांची मान्यता आहे. केतू मंदिराबाबत एक आख्यायिका सांगितली जाते. बाळे येथील मंदिराचे पुजारी अमोल राजीव पाटील यांनी याबाबत लोकल18 शी बोलताना माहिती दिलीये.

श्री खडेरायांना महादेवाचे रुप मानले जाते, तर केतू ग्रह (मांगोबा) शिवपार्वतीचा अंश मानला जातो. त्यामुळे मांगोबा यांना खंडेरायाचे शिष्य मानले जाते. सोलापुरातील बाळे येथे केतूचे स्वयंभू ठिकाण आहे. अनेक गावातून भाविक आपल्या समस्या, व्यथा घेऊन याठिकाणी येतात. या केतूच्या स्थानाला राहू-केतू स्थान असेही म्हटले जाते. सत्ययुगात समुद्र मंथनामध्ये राहूचे दोन तुकडे झाले. त्यापैकी एक तुकडा येथील वाडी वस्तीला पडले. श्री गणेशाने हे दोन्ही तुकडे एकजागी येऊ नये म्हणून एक तुकडा इथे ठेवल्याचं मानलं जातं. याच ठिकाणी केतू मंदिर असून इथं दर्शन घेतल्यानं राहू-केतूचे दोष कमी होतात, अशी आख्यायिका सांगितली जाते.