IPL सुरू होण्याआधीच BCCI ची मोठी घोषणा! तब्बल 18 वर्षानंतर या ठिकाणी खेळणार टीम इंडिया! पण कॅप्टन कोण?

भारतीय क्रिकेट संघ जून 2026 मध्ये आयर्लंडचा दौरा करणार असून, भारतीय क्रिकेट नियामक मंडळाने (BCCI) शनिवारी या टी-ट्वेंटी मालिकेचे वेळापत्रक अधिकृतपणे जाहीर केलं आहे. विशेष म्हणजे, 18 वर्षांनंतर भारतीय टीम पुन्हा एकदा बेलफास्टमध्ये खेळताना दिसणार आहे, असं बीसीसीआयने सांगितलं आहे. बीसीसीआयने जाहीर केल्यानुसार, भारत आणि आयर्लंड यांच्यात दोन टी-20 मॅचेसची मालिका खेळवली जाईल. या दोन्ही मॅचेस बेलफास्ट येथील 'स्टॉर्मोंट क्रिकेट ग्राऊंड'वर होणार आहेत.

भारतीय संघ 2007 नंतर पहिल्यांदाच बेलफास्टमध्ये आंतरराष्ट्रीय मॅच खेळणार आहे. यापूर्वीचे 2018, 2022 आणि 2023 मधील दौरे प्रामुख्याने डब्लिन (मॅलाहाइड) येथे झाले होते. अलीकडेच टी-20 वर्ल्ड कप 2026 चे जेतेपद पटकावल्यानंतर सूर्यकुमार यादवच्या नेतृत्वाखालील भारतीय संघाचा हा पहिलाच आणि महत्त्वाचा परदेश दौरा असेल. आयर्लंडविरुद्धच्या या दोन मॅचेस संपल्यानंतर भारतीय संघ थेट इंग्लंडला रवाना होईल. तिथे 1 जुलैपासून 5 टी-20 आणि 3 वनडे मॅचेसची मोठी मालिका खेळवली जाणार आहे.

दरम्यान, आयर्लंडचा अनुभवी खेळाडू पॉल स्टर्लिंगने टी-20 कर्णधारपदावरून निवृत्ती घेतल्याने, या मालिकेत आयर्लंडचा संघ नव्या नेतृत्वाखाली मैदानात उतरेल. या दौऱ्यापूर्वी भारतीय संघ घरच्या मैदानावर अफगाणिस्तानविरुद्ध एक कसोटी आणि तीन वनडे मॅचेसची मालिका खेळणार आहे, जी 20 जून रोजी संपेल.