ENG vs NZ : इंग्लंडच्या संघात पाकचा 'सिक्रेट एजन्ट', न्यूझीलंडच्या तोंडातून विजय खेचणारा रेहमान अहमद कोण? पाकिस्तानशी कनेक्शन काय?

मॅच जिंकण्यासाठी कॅप्टन मिचेल सँटनर याने ग्लेन फिलिप्स याच्याकडे बॉल सोपवला. 18 वी ओव्हर काढली म्हणजे मॅच हातात येईल, असं त्याला वाटलं असावं पण इंग्लंडने काऊंटर अटॅक केला. इंग्लंडचा 21 वर्षाचा डेब्यू करणाऱ्या रेहान अहमद याने आक्रमक खेळ दाखवत 271 च्या स्ट्राईक रेटने 7 बॉलमध्ये 19 धावांची खेळी केली अन् अवघड असा विजय सोपा करून दिला. विल जॅक्ससह त्याने 19 बॉलमध्ये 44 धावांची पार्टनरशीप केली.

स्वत: मिचेल सँटनर याच्याकडे देखील रेहानविरुद्ध काही पर्याय नव्हता. विल जॅक्स आणि रेहान अहमद यांनी न्यूझीलंडचा अखेरच्या 13 मिनिटात गेम केला. त्यामुळे आता पाकिस्तानसाठी सेमीफायनलमध्ये पोहोचायचं असेल तर मोठी संधी आहे. पण न्यूझीलंडला धक्का देणारा हा रेहान अहमद आहे तरी कोण? रेहान अहमदचं पाकिस्तानशी कनेक्शन काय आहे? असा सवाल विचारला जाऊ लागलाय. तर रेहान अहमद हा पाकिस्तानी वंशाचा आहे.

रेहान अहमदच्या वैयक्तिक आयुष्याबद्दल बोलायचे झाले तर त्याचा पाकिस्तानशी खूप जवळचा संबंध आहे. तो मूळचा पाकिस्तानी वंशाचा ब्रिटिश नागरिक असून त्याच्या कुटुंबाची मुळे पाकिस्तानात खोलवर रुजलेली आहेत. रेहानचे वडील, नईम अहमद, हे स्वतः क्रिकेटचे मोठे चाहते होते. ते पाकिस्तानमधील मीरपुरचा रहिवासी असून तिथे ते क्लब क्रिकेटमध्ये एक फास्टर बॉलर आणि ऑलराउंडर म्हणून खेळायचे.

दरम्यान, आपल्या कुटुंबाला उत्तम सोयीसुविधा आणि चांगलं जीवन मिळावं या जिद्दीने नईम 2001 मध्ये इंग्लंडला गेले. तिथे त्यांनी सुरुवातीच्या काळात टॅक्सी ड्रायव्हर म्हणून काम करून आपल्या मुलाच्या स्वप्नांना बळ दिलं. आपल्या मुलाला त्यानी क्रिकेटसाठी मेहनत घेताना पाहिलंय. आता तोच मुलगा इंग्लंडच्या राष्ट्रीय संघात खेळतोय अन् त्याने पाकिस्तानसाठी सेमीफायनलच्या आशा देखील जिवंत केल्या आहेत.