ENG vs SL: स्टेडियममधील 35,000 लोकांना कळाले, पण निसांकाला कळला नाही तो ट्रॅप ; एका बॉलवर संपूर्ण मॅच फिरली

पालेकेले मैदानावर श्रीलंकेचा डाव सुरू असताना जोफ्रा आर्चर तिसरे षटक टाकत होता. षटकाच्या पहिल्याच चेंडूवर निसांकाने पुढे येत फुल लेंथ चेंडू मिड-ऑफच्या डावीकडे जोरात मारला, पण धाव मिळाली नाही. पुढील दोन चेंडूंवर मात्र त्याने आपला क्लास दाखवला. दुसऱ्या चेंडूवर लेंथ डिलिव्हरीला उशिरा बॅट शॉटमारत बॅकवर्ड पॉइंट आणि कव्हरमधील मोकळ्या जागेत अप्रतिम चौकार मारला. तिसऱ्या चेंडूवर लेगसाईडकडे वळणाऱ्या स्लोअर बॉलला गुडघ्यावर बसून त्याने फाइन लेगच्या दिशेने चौकार ठोकला. या दोन फटक्यांमुळे तो लयीत आल्याचे दिसत होते.

मात्र इंग्लंडने याच क्षणी डावपेच रचला. चौथ्या चेंडूपूर्वीच डीप मिडविकेटवर जेमी ओव्हर्टनला हलवण्यात आले. चौथ्या चेंडूवर आर्चरने वेगवान आणि स्टंपवर येणारा फुल लेंथ चेंडू टाकला. निसांकाने नेहमीप्रमाणे ‘व्हिपी’ फटका मारत चेंडू उंचावला, पण तो शॉट खाली ठेवण्यात अपयशी ठरला. डीप मिडविकेटवर उभा असलेला ओव्हर्टन सुरुवातीला सूर्यप्रकाशामुळे अडचणीत दिसला, तरी त्याने डोक्यावरून उत्कृष्ट झेल घेतला. निसांकाच्या विकेटने संपूर्ण मैदान क्षणभर स्तब्ध झाले. इंग्लंडच्या संघाने त्याच्यासाठी केलेला ट्रॅप संपूर्ण स्टेडियममधील चाहत्यांना दिसला. पण तो निसकाला कळला नाही आणि अवघ्या 9 धावा करून तो इंग्लंडच्या जाळ्यात अडकला. निसकाच्या विकेटनंतर श्रीलंकेची घसरण सुरू झाली.

गेल्या सामन्यात शतक ठोकणाऱ्या निसांकाकडून मोठ्या खेळीची अपेक्षा होती. मात्र इंग्लंडने अचूक क्षेत्ररचना आणि वेगवान माऱ्याच्या जोरावर त्याला सापळ्यात अडकवले आणि श्रीलंकेच्या डावाला सुरुवातीलाच मोठा धक्का दिला. त्यानंतर श्रीलंकेची फलंदाजी कोसळली आणि 147 धावांच्या लक्ष्याचा पाठलाग करताना संपूर्ण संघ 96 धावांत गारद झाला.