Ashes सुरू असतानाच आली वाईट बातमी, इंग्लंडच्या दिग्गज क्रिकेटपटूचं निधन

मुंबई : इंग्लंडची क्रिकेट टीम सध्या ऑस्ट्रेलियाच्या दौऱ्यावर ऍशेस सीरिजसाठी गेली आहे. 5 टेस्ट मॅचच्या या सीरिजच्या पहिल्या 3 टेस्ट ऑस्ट्रेलियाने तर चौथी टेस्ट इंग्लंडने जिंकली आहे. इंग्लंडची टीम ऑस्ट्रेलियामध्ये असतानाच त्यांच्या दिग्गज क्रिकेटपटूचं निधन झालं आहे. इंग्लंडचे माजी क्रिकेटपटू आणि इंग्लंड क्रिकेट बोर्डाचे माजी सीईओ ह्यू मॉरिस यांचं निधन झालं आहे, ते 62 वर्षांचे होते. वेल्स काउंटी संघ ग्लॅमॉर्गनने रविवारी एका निवेदनात म्हटले आहे की त्यांचे माजी कर्णधार मॉरिस यांचे अनेक वर्षे आतड्यांसंबंधी कर्करोगाशी झुंज देऊन निधन झाले. ओपनिंग बॅटर म्हणून मॉरिसनी इंग्लंडसाठी तीन सामने खेळले आणि 1997 मध्ये ग्लॅमॉर्गनला काउंटी चॅम्पियन बनण्यास मदत केली. त्यानंतर एका वर्षानंतर ते क्रिकेटमधून निवृत्त झाले.