IND vs SA : 31व्या ओव्हरच्या दुसऱ्या बॉलला फिरली मॅच, बऊमाच्या ट्रम्प कार्डने टीम इंडियाचा खेळ खल्लास!

दक्षिण आफ्रिकेच्या आव्हानाचा पाठलाग करताना भारताची सुरूवात खराब झाली. 1 रनवरच यशस्वी जयस्वाल आणि केएल राहुल हे दोन्ही ओपनर माघारी परतले. यानंतर वॉशिंग्टन सुंदरने एकट्याने किल्ला लढवायला सुरूवात केली. बॅटिंगसाठी कठीण असलेल्या या खेळपट्टीवर वॉशिंग्टन सुंदर सेट झाला होता, पण तेव्हाच टेम्बा बऊमाने त्याचं ट्रम्प कार्ड बाहेर काढलं.

बऊमाने एडन मार्करमच्या हातात बॉल दिला आणि त्याने जादू केली. 31 व्या ओव्हरच्या दुसऱ्या बॉलला वॉशिंग्टन सुंदर आऊट झाला. मार्करमने टाकलेला बॉल सुंदरच्या बॅटला लागून पहिल्या स्लिपमध्ये गेला आणि हार्मरने त्याचा कॅच पकडला. 92 बॉलमध्ये 31 रन करून सुंदर पॅव्हेलियनमध्ये परतला. सुंदरची विकेट गेल्यानंतर मात्र कोणत्याही भारतीय बॅटरला मोठा स्कोअर करता आला नाही.

सिमन हार्मरच्या 4 विकेटशिवाय मार्को यानसन आणि केशव महाराज यांना 2-2 आणि एडन मार्करमला 1 विकेट घेण्यात यश आलं. भारताकडून वॉशिंग्टन सुंदरने 31, अक्षर पटेलने 26 आणि रवींद्र जडेजाने 18 रन केले. मागच्या एका वर्षातला टीम इंडियाचा घरच्या मैदानातला 6 सामन्यांमधला हा चौथा पराभव आहे. न्यूझीलंडने 3-0 ने हरवल्यानंतर आता भारताला दक्षिण आफ्रिकेविरुद्धही पराभव पत्करावा लागला आहे, त्यामुळे प्रशिक्षक गौतम गंभीरच्या रणनीतीवर टीकेची झोड उठली आहे.