आवड बनली प्रेरणा, उभं केलं जगातील सर्वात मोठं क्रिकेट संग्रहालय पुण्यात, क्रिकेटप्रेमींसाठी एक पर्वणी, Video

पुणे : क्रिकेट हा भारतात लोकप्रिय खेळ मानला जातो आणि अनेकांच्या मनात या खेळाबद्दल विलक्षण जिव्हाळा असतो. पण या आवडीला व्यावसायिक रूप देत जगातील सर्वात मोठ्या क्रिकेट संग्रहालयाची निर्मिती करणाऱ्या व्यक्तीचे नाव रोहन पाटे आहे. पुण्यातील सहकार नगर भागात 2010 साली त्यांनी ब्लेड्स ऑफ ग्लोरी क्रिकेट म्युझिअमची स्थापना केली आणि आज हे संग्रहालय जगभरातील क्रिकेटप्रेमींसाठी एक पर्वणी ठरले आहे.

2010 मध्ये त्यांना सचिन तेंडुलकर यांची ओरिजनल बॅट मिळाली आणि तिथूनच त्यांच्या संग्रहालयाच्या प्रवासाला सुरुवात झाली. त्यांनी ठरवलं की सचिनची बॅट मिळाली, तर इतर दिग्गज खेळाडूंचं सामानसुद्धा मिळवता येईल. आज त्यांच्या संग्रहात 75 हजारांहून अधिक क्रिकेटशी संबंधित वस्तू आहेत.

याशिवाय, 1975 ते 2023 पर्यंतच्या वर्ल्ड कप विजेत्या संघांमधील खेळाडूंच्या सही असलेला एक स्वतंत्र विभाग इथे पाहायला मिळतो. इतकंच नव्हे तर, 1800 साली क्रिकेट कसं होत, यापासून आजच्या आधुनिक क्रिकेटपर्यंतचा प्रवास येथे अनुभवता येतो.

क्रिकेट प्रेमापासून सुरू झालेला हा प्रवास आज एका जागतिक कीर्तीच्या संग्रहालयात परिवर्तित झाला आहे. पुण्यातील क्रिकेटप्रेमींसाठी हे म्युझिअम म्हणजे एक अमूल्य ठेवा ठरतोय.