Asia Cup 2025 : सुर्यकुमार यादववर होणार कारवाई? पाकिस्तानच्या तक्रारीनंतर सुनावणी पडली पार, निकाल कधी?

पाकिस्तान क्रिकेट बोर्डाने भारतीय कर्णधार सूर्यकुमार यादवविरुद्ध दोन मुद्द्यांवर तक्रार दाखल केली होती. पहिला मुद्दा म्हणजे पाकिस्तानचा पराभव केल्यानंतर सुर्यकुमार यादवने हा विजय पहलगाम भारताच्या सैन्य दलाला समर्पित केला होता. त्यामुळे पाकिस्तान क्रिकेट बोर्डाने सुर्याचे हे विधान राजकीयदृष्ट्या प्रेरित असल्याचे म्हणत तक्रार दाखल केली होती. याव्यतिरिक्त, पीसीबीने पाकिस्तानी खेळाडूंशी हस्तांदोलन करण्यास नकार दिल्याबद्दल सूर्यकुमार यादवविरुद्ध तक्रार दाखल केली होती.

पाकिस्तानच्या या तक्रारीनंतर आयसीसी एलिट पॅनेल मॅच रेफरी रिची रिचर्डसन यांच्यासमोर सूर्यकुमार यादव यांची सुनावणी 25 सप्टेंबरला पार पडली आहे.आता सूत्रांनी दिलेल्या माहितीनुसार, सामनाधिकारी 26 सप्टेंबर (शुक्रवार) रोजी यावर अंतिम निर्णय देणार आहेत.

सूर्यकुमार यादवप्रमाणेच साहिबजादा फरहान आणि हरिस रौफ यांनीही आरोप फेटाळले आहेत. पाकिस्तानी खेळाडूंसोबत सामनाधिकारींची सुनावणी 26 सप्टेंबर (शुक्रवार)ला होणार आहे. जर साहिबजादा फरहान आणि हरिस रौफ यांच्यावरील आरोप खरे ठरले तर त्यांना कठोर शिक्षा होऊ शकते, कारण खेळाडू मैदानावर खेळाच्या भावनेविरुद्ध हावभाव करू शकत नाहीत.