T20 World Cup : 6,6,6,6,6,6,6... वानखेडेवर हेटमायरचं वादळ, 250 च्या स्ट्राईक रेटने झिम्बाब्वेची धुळधाण

शिमरन हेटमायरने त्याच्या इनिंगमधली एक सिक्स तब्बल 108 मीटर लांब मारली. 19 बॉलमध्येच हेटमायरने त्याचं अर्धशतक पूर्ण केलं. टी-20 वर्ल्ड कपच्या इतिहासातली वेस्ट इंडिजच्या खेळाडूचं हे सगळ्यात जलद अर्धशतक होतं. याआधी याच टी-20 वर्ल्ड कपमध्ये शेमरन हेटमायरनेच स्कॉटलंडविरुद्ध 22 बॉलमध्ये अर्धशतक ठोकलं होतं. हेटमायरने या सामन्यात धमाका केला असला तरी त्याला दोन जीवनदान मिळाली. दोन्ही वेळा मुसेकिवाने हेटमायरचा कॅच सोडला.

हेटमायर आणि रोव्हमन पॉवेल यांच्यामध्ये तिसऱ्या विकेटसाठी 122 रनची पार्टनरशीप झाली. रोव्हमन पॉवेलने 29 बॉलमध्ये त्याचं अर्धशतक पूर्ण केलं. 35 बॉलमध्ये 59 रन करून पॉवेल पॅव्हेलियनमध्ये परतला. पॉवेलने त्याच्या या खेळीमध्ये 4 फोर आणि 4 सिक्स मारल्या. हेटमायर आणि पॉवेलची विकेट गेल्यानंतरही वेस्ट इंडिजने आक्रमक बॅटिंग सुरूच ठेवली. शरफेन रदरफोर्डने 13 बॉलमध्ये 31, रोमारियो शेफर्डने 10 बॉल 21 आणि जेसन होल्डरने 4 बॉल 13 रन केले, त्यामुळे वेस्ट इंडिजने 20 ओव्हरमध्ये 6 विकेट गमावून 254 रनचा डोंगर उभारला. झिम्बाब्वेकडून नगारवा, मुझरबानीला 2-2 आणि इव्हान-क्रीमर यांना 1-1 विकेट घेण्यात यश आलं.

सुपर-8 मधला वेस्ट इंडिजचा हा पहिलाच सामना आहे. पहिल्याच सामन्यातून वेस्ट इंडिजने त्यांचे इरादे स्पष्ट केले आहेत. सुपर-8 च्या 3 सामन्यांमध्ये 3 विजय मिळवणारी टीम सेमी फायनलमध्ये प्रवेश करेल. वेस्ट इंडिजच्या ग्रुपमध्ये टीम इंडिया, झिम्बाब्वे आणि दक्षिण आफ्रिका आहेत. या ग्रुपमधून टॉप-2 टीम सेमी फायनलमध्ये क्वालिफाय होतील.