'जगापासून पळण्यापेक्षा मी...', वीर पहाडियासोबत ब्रेकअप, महिनाभरातच तारा सुताराने दिली गुड न्यूज!

बॉलिवूडमधील ग्लॅमरस अभिनेत्री गेल्या काही महिन्यांपासून चर्चेत आहे. आदर जैनसोबतच्या ब्रेकअपनंतर बऱ्याच काळाने तिच्या आयुष्यात पुन्हा एकदा प्रेमाने एन्ट्री केली. वीर पहाडिया आणि ताराने त्यांचं रिलेशनशिप कन्फर्म करताच चाहत्यांनी त्यांच्यावर प्रेमाचा वर्षाव केला.

मात्र, दुधात मीठाचा खडा पडावा तसं त्यांच्या नात्यात कटुता आली आणि अवघ्या काही महिन्यात त्यांनी वेगळं होण्याचा निर्णय घेतला. या दुःखातून सावरत असतानाच ताराने एक आनंदाची बातमी चाहत्यांसोबत शेअर केली आहे.

तारा सुतारियासाठी २०२६ या वर्षाची सुरुवात अत्यंत खास ठरली आहे. अनेक वर्षांच्या मेहनतीनंतर ताराने मुंबईत स्वतःचं हक्काचं घर खरेदी केलं असून, आज या नवीन घराच्या गृहप्रवेशाचे फोटो शेअर करत तिने चाहत्यांना सुखद धक्का दिला आहे.

वैयक्तिक आयुष्यात वादळ सुरू असताना ताराने घेतलेलं नवीन घर, हे तिच्या आयुष्यातील एका मोठ्या बदलाचे प्रतीक मानलं जात आहे.

सोमवारी, २३ फेब्रुवारी रोजी ताराने तिच्या नवीन घराची पहिली झलक सोशल मीडियावर शेअर केली. शेअर केलेल्या फोटोंमध्ये तारा पांढऱ्या साडीत अत्यंत देखणी दिसत आहे. देवापुढे हात जोडून प्रार्थना करतानाचा तिचा फोटो चाहत्यांना खूप आवडला आहे.

हे घर एखाद्या राजवाड्यासारखं थाटामाटाचं नसून, अत्यंत शांत, सोबर आणि क्लासी पद्धतीने सजवलेलं आहे. घराचा प्रत्येक कोपरा ताराच्या व्यक्तिमत्त्वासारखाच सौम्य आणि सुंदर वाटतोय.

हे फोटो शेअर करताना ताराने कॅप्शनमध्ये लिहिलंय, "नवी सुरुवात... माझ्या पहिल्या घरात आता फक्त हास्य आणि प्रेम असेल. २०२६ चं स्वागत मी आता मोकळ्या हातांनी करतेय." तिने आपल्या इंस्टाग्राम स्टोरीमध्ये एक ओळ जोडली जी सर्वांचं लक्ष वेधून घेतेय, "पहिली गोष्ट नेहमीच खास असते!"

ताराचा हा गृहप्रवेश अशा वेळी झाला आहे, जेव्हा तिच्या आणि वीर पहाडिया यांच्या ब्रेकअपच्या चर्चांनी जोर धरला आहे. २०२५ मध्ये या दोघांनी आपल्या नात्याची कबुली दिली होती, पण अलीकडेच एपी ढिल्लनच्या कॉन्सर्टनंतर त्यांच्या नात्यात दुरावा आल्याचं बोललं जातंय. वीरच्या वाढदिवसाला ताराची अनुपस्थिती आणि नुपूर सॅनॉनच्या लग्नाला वीरचं एकटं येणं, यावरून त्यांच्यातील फूट स्पष्ट झाली आहे.

या सर्व गोंधळावर ताराने 'एले इंडिया'ला दिलेल्या मुलाखतीत सूचक वक्तव्य केलं. ती म्हणाली, "मी आता माझ्या मनाची शांती कशी जपायची हे शिकले आहे. जेव्हा मला कामाचा किंवा बाहेरच्या जगाचा ताण येतो, तेव्हा मी पळण्यापेक्षा स्वतःच्या जवळ राहणं पसंत करते. शांत बसणं, एकांतात राहणं हीच आता माझी ताकद आहे."

आपल्या करिअरबद्दल बोलताना ताराने अत्यंत धाडसी विधान केलं आहे. ती म्हणाली, "मी अनेकदा अशा भूमिकांना किंवा संधींना नकार दिला आहे, ज्या माझ्या तत्त्वांत बसत नव्हत्या. माझ्यासाठी स्वतःची मूल्यं सगळ्यात महत्त्वाची आहेत. मी एखादा सिनेमा गमावू शकते, पण स्वतःला गमावणं मला कधीच मान्य नाही."