IPL : विराटसोबत पंगा घेणारा होणार KKR चा कोच! अजिंक्य रहाणेची कॅप्टन्सीही धोक्यात

अनिल कुंबळेच्या वाढदिवसानिमित्त केकेआरने त्याचे फोटो शेअर केले आहेत. एक माणूस, बऱ्याच भूमिका, असं कॅप्शन केकेआरने या पोस्टला दिलं आहे. केकेआरच्या या पोस्टनंतर चाहते कुंबळे केकेआरचा पुढचा प्रशिक्षक होणार का? असा प्रश्न विचारत आहेत.

आयपीएल 2026 आधी केकेआर प्रशिक्षकाच्या शोधात आहे, कारण टीमचे प्रशिक्षक चंद्रकांत पंडित यांनी याचवर्षी जुलै महिन्यात केकेआरचं प्रशिक्षकपद सोडलं होतं. तर कुंबळेला याआधीही आयपीएल टीमच्या प्रशिक्षकपदाचा अनुभव आहे. कुंबळे हा पंजाब किंग्सचा प्रशिक्षही होता. सध्या कुंबळे कोणत्याही टीमचा प्रशिक्षक नाही, त्यामुळे कुंबळे केकेआरचा कोच होण्याची शक्यता आहे.

अनिल कुंबळे 2016 साली टीम इंडियाचा प्रशिक्षक झाला होता. कुंबळे कोच असताना टीम इंडियाने बरंच यश मिळवलं, पण 2017 च्या चॅम्पियन्स ट्रॉफी फायनलनंतर कर्णधार विराट कोहलीचे कुंबळेसोबत वाद झाले, त्यानंतर कुंबळेने टीमचं प्रशिक्षकपद सोडलं आणि मग रवी शास्त्री टीम इंडियाचे प्रशिक्षक झाले.

आयपीएलच्या मागच्या मोसमात केकेआरची कामगिरी फारच निराशाजनक झाली. 14 सामन्यांमध्ये केकेआरला फक्त 5 मॅच जिंकता आल्या, तर 7 सामन्यांमध्ये त्यांचा पराभव झाला आणि त्यांच्या 2 मॅच पावसामुळे रद्द झाल्या. पॉईंट्स टेबलमध्ये केकेआर आठव्या क्रमांकावर राहिली. अजिंक्य रहाणेच्या नेतृत्वात केकेआरने आयपीएलचा मागचा सिझन खेळला, पण यंदा केकेआर टीमचा कर्णधार बदलणार का? याबाबत चर्चा सुरू आहेत. आयपीएल 2026 साठीचा लिलाव 15 डिसेंबरला होण्याची शक्यता आहे, त्याआधी 15 नोव्हेंबरपर्यंत सर्व टीमना रिटेन केलेल्या आणि रिलीज केलेल्या खेळाडूंची यादी द्यावी लागणार आहे. ही यादी समोर आल्यानंतरच केकेआर कोणाला टीममध्ये कायम ठेवणार आणि कोणाला डच्चू देणार? हे स्पष्ट होणार आहे.