स्पॅम कॉलमुळे त्रस्त आहात? संचार साथी पोर्टलवरुन अशी करा कॉलरची तक्रार 

स्पॅम कॉल्सना आळा घालण्यासाठी भारतीय दूरसंचार नियामक प्राधिकरणाने (ट्राय) कठोर कारवाई केली आहे. आता, ट्रायने फक्त नोंदणीकृत नंबरद्वारे कमर्शियल कम्यूनिकेशनला परवानगी दिली आहे. नोंदणी नसलेल्या नंबरवरून स्पॅम कॉल करणाऱ्यांना कारवाईला सामोरे जावे लागेल. नियमांनुसार, ट्राय अशा कॉलरचे सर्व टेलिकॉम रिसोर्सेस निलंबित करू शकते किंवा त्यांचे कनेक्शन देखील डिस्कनेक्ट करू शकते.

तुम्हाला नोंदणीकृत नसलेल्या नंबरवरून स्पॅम किंवा मार्केटिंग कॉल येत असतील, तर तुम्ही संचार साथी पोर्टलवर तक्रार दाखल करू शकता. ही प्रक्रिया खूप सोपी आहे आणि तुमची तक्रार काही स्टेप्समध्ये नोंदवली जाईल. प्रथम, संचार साथी पोर्टलवर जा आणि नागरिक केंद्र सेवांवर टॅप करा किंवा क्लिक करा. त्यानंतर, 'रिपोर्ट सस्पेक्टेड अँड अनसोलिसिटेड कमर्शियल कम्युनिकेशन्स' वर क्लिक करा. एक नवीन पेज उघडेल जिथे तुम्ही तक्रार दाखल करू शकता. विविध पर्यायांमधून निवडा आणि फॉर्म सबमिट करा. तक्रार दाखल करण्यासाठी तुमच्याकडे स्क्रीनशॉट असणे आवश्यक आहे याची कृपया नोंद घ्या.

तुम्हाला स्पॅम कॉल करणाऱ्यांविरुद्ध कारवाई करायची असेल, तर तुम्हाला 7 दिवसांच्या आत तक्रार नोंदवावी लागेल. तुम्ही स्पॅम कॉल किंवा SMS मिळाल्यापासून सात दिवसांच्या आत तक्रार केली तर कॉल करणाऱ्या किंवा पाठवणाऱ्याविरुद्ध कारवाई केली जाईल. सात दिवसांनंतर तक्रार केल्याने कॉल करणाऱ्या किंवा पाठवणाऱ्याविरुद्ध कोणतीही कारवाई होणार नाही, परंतु ते सिस्टमला कॉलर ओळखण्यास मदत करेल.