तासाचा प्रवास मिनिटांत, बदलापूर पूर्व-पश्चिम प्रवासाची कोंडी सुटणार, गेमचेंजर प्लॅन काय?

मुंबई महानगर प्रदेश विकास प्राधिकरणाकडून हे काम हाती घेण्यात आले आहे. या कामाचा सविस्तर प्रकल्प अहवाल तयार करण्यासाठी निविदा मागवण्यात आल्या आहेत. सध्या बदलापूर पूर्व-पश्चिम प्रवासासाठी एकमेव उड्डाणपूल असून त्यावर मोठ्या प्रमाणावर वाहतूक कोंडी होते. विशेषत: पावसाळ्यात तर या ठिकाणी प्रवाशांची बिकट स्थिती होते. त्यामुळे शहरात नव्या उड्डाणपुलांची मागणी होत होती.

सध्या बदलापूरचे प्रवेशद्वार असलेल्या बेलवली येथील शिवमंदिर तलाव ते कार्मेल शाळेपर्यंत उड्डाणपूल उभारला जात आहे. त्यासाठीची सर्व प्रक्रिया देखील पार पडली आहे. हा उड्डाणपूल झाल्याने वाहनचालकांना दिलासा मिळणार आहे. तसेच त्याचा फायदा अंबरनाथच्या चिखलोली परिसर, अंबरनाथ तालुक्यातील ग्रामीण भाग अशा सर्वांना होईल.