Terror Attack: बलूचिस्तान हाहाकार, प्रवासी बसवर अंधाधुंद गोळीबार; थरकाप उडवणारा हल्ला

बलूचिस्तान सरकारचे प्रवक्ते शाहिद रिंद यांनी सांगितले की या घटनेत तीन प्रवाशांचा मृत्यू झाला असून सात जण जखमी झाले आहेत. जखमींना कलातच्या जिल्हा मुख्यालय रुग्णालयात दाखल करण्यात आले असून तेथे आपत्कालीन परिस्थिती जाहीर करण्यात आली आहे. मात्र एधी फाउंडेशनच्या बचाव अधिकाऱ्यांनी नंतर सांगितले की जखमींची संख्या 10 वर पोहोचली आहे आणि अनेक जणांना उपचारासाठी क्वेटाच्या सिव्हिल रुग्णालयात हलवण्यात आले आहे. या हल्ल्याची जबाबदारी अद्याप कोणत्याही संघटनेने स्वीकारलेली नाही.

दहशतवादी दबा धरून बसले होते आणि मग त्यांनी हल्ला केला. त्यांनी आधी बस थांबवली आणि रस्त्याच्या दोन्ही बाजूंनी गोळीबार केला. हल्लेखोरांची अचूक संख्या अद्याप स्पष्ट झालेली नाही. पाकिस्तानचे राष्ट्रपती आसिफ अली झरदारी यांनी या गोळीबाराचा तीव्र शब्दांत निषेध केला असून अधिकाऱ्यांना जखमींना उत्तम वैद्यकीय सेवा देण्याचे निर्देश दिले आहेत. डॉनच्या माहितीनुसार राष्ट्रपती झरदारी यांनी म्हटले आहे की, निरपराध नागरिकांना लक्ष्य करणे ही क्रूरता आहे. दहशतवादी हे मानवतेचे आणि शांततेचे शत्रू आहेत आणि ते देशातील स्थिरता भंग करण्याचा प्रयत्न करत आहेत.