पोरीला लिप स्टड हवं होतं, फक्त 700 रुपयांत विकले 1 कोटींचे दागिने, आईनं गाठलं पोलीस ठाणं, पुढे काय झालं? 

या मुलीला लिप स्टड (ओठात घालण्याचे एक प्रकारचे पिअर्सिंग दागिने) खरेदी करायचे होते, ज्याची किंमत साधारण 700 रुपये होती. लिप स्टड हे एक छोटेसे नखासारखा दागिना असतो, ज्याला मागील बाजूस सरळ किंवा किंचित वाकलेली रॉड आणि सपाट बेस किंवा बॉल लॉक असतो.

या घटनेचा उलगडा तेव्हा झाला, जेव्हा मुलीच्या आईला अर्थात वँग यांना घरातील महागडे दागिने गायब असल्याचे लक्षात आले. ही बाब समजताच त्यांनी तातडीने पोलीस ठाण्यात तक्रार दाखल केली. पोलिसांनी तपास केल्यानंतर समोर आले की, या मुलीने दागिने केवळ काही पैशांमध्ये विकले होते. या घटनेशी संबंधित एक व्हिडिओही व्हायरल झाला असून, त्यामध्ये जेड ब्रेसलेट, हार आणि मौल्यवान रत्नांनी जडवलेले इतर दागिने चोरीला गेल्याचे दिसून आले.

मुलगी ली हिने आईचे दागिने खरे असल्याचे समजलेच नाही. तिला ते बनावट वाटले आणि तिने ते स्थानिक बाजारातील जेड रिसायकलिंग दुकानात विकून टाकले. "मी तिला विचारले की, तिने दागिने का विकले? त्यावर तिने उत्तर दिले की, त्या दिवशी तिला पैशांची गरज होती. मी विचारले, किती पैसे हवे होते, तर तिने सांगितले - 60 युआन. मग मी विचारले की, हे पैसे कशासाठी हवे होते, तर ती म्हणाली - 'माझ्या ओठात स्टड घालायचा होता, त्यासाठी हवे होते'" असे वँग यांनी पोलिसांना सांगितले.

पोलीस अधिकारी फॅन गाओजिए यांच्या माहितीनुसार, तक्रार मिळताच बाजारातील सीसीटीव्ही फुटेज तपासण्यात आले आणि व्यवस्थापनासोबत समन्वय साधण्यात आला. "त्या दिवशी दुकानाचा मालक तिथे नव्हता, पण आम्ही त्याला फोनद्वारे संपर्क साधून पोलीस ठाण्यात बोलावले," असे त्यांनी सांगितले. अखेरीस या दागिन्यांचा मागोवा लावण्यात पोलिसांना यश आले आणि ते वँग यांना परत मिळाले.