Nagpur Accident News: देवदर्शनापूर्वीच काळाचा घाला, भीषण अपघातात वाहनांचा चक्काचूर, राजस्थानमध्ये महाराष्ट्रातील ३ जण ठार

कामठी येथील रहिवासी महादेव पारसे हे आपल्या कुटुंबासह राजस्थानमधील प्रसिद्ध खाटू श्याम बाबांच्या दर्शनासाठी 'टवेरा' गाडीने निघाले होते. सालासर रोडवर त्यांच्या वाहनाला एका भरधाव पिकअप गाडीने जोरदार धडक दिली. ही धडक इतकी भीषण होती की टवेरा गाडीचा अक्षरशः चक्काचूर झाला. यामध्ये महादेव पारसे, त्यांच्या पत्नी कांता पारसे आणि मुलगा घनश्याम पारसे या तिघांचा जागीच प्राण गेला.

या अपघातात गाडीचा चालक मनोज चिंदमवार यांच्यासह आराधना पारसे, पायल पारसे, पल्लवी पारसे, पुनम पारसे, तुषार पारसे आणि पवन बागडे हे सहा जण गंभीर जखमी झाले आहेत. अपघाताची माहिती मिळताच स्थानिक पोलिसांनी तातडीने धाव घेत जखमींना सालासर येथील रुग्णालयात दाखल केले. सध्या त्यांच्यावर उपचार सुरू असून काही जणांची प्रकृती चिंताजनक असल्याचे समजते.

पारसे कुटुंब हे कामठीतील कचरीपुरा भागातील प्रतिष्ठित कुटुंब मानले जाते. अपघाताची बातमी समजताच संपूर्ण परिसरात खळबळ उडाली. एकाच कुटुंबातील तीन सदस्य दगावल्याने परिसरातून हळहळ व्यक्त केली जात आहे. मृतदेह शवविच्छेदनानंतर नागपुरात आणले जाणार असल्याची माहिती नातेवाईकांनी दिली आहे.