Kitchen Jugaad Video : किचनमधील भांडी ठेवा फक्त एका बाटलीत

पाणी, कोल्डड्रिंक, ज्युसच्या प्लॅस्टिक बाटली तर आपण रिकामी झाली की सहज फेकून देतो. पण याचा अनोखा असा वापर जो आज तुम्ही पाहिला तर प्लॅस्टिक बाटली कधी फेकणार नाही. कारण हीच प्लॅस्टिक बाटली तुमच्या किचनमधील भांड्याचा पसारा कमी करण्यात तुम्हाला मदत करेल. घर किंवा किचन लहान असेल तर भांडी कुठे ठेवायचा हा प्रश्न असतो. पण काही भांडी तुम्ही प्लॅस्टिक बाटलीत ठेवू शकता. यामुळे भांड्यांना जागाही कमी लागेल. आता ते कसं काय?

व्हिडीओत दाखवल्यानुसार प्लॅस्टिक बाटली झाकणाच्या भागाकडून थोड्या खाली भागावर कापा. त्यानंतर बाटलीला मधेच कट द्या. आता या बाटलीत तुम्ही कप ठेवू शकता. कप बाटलीत भरल्यानंतर बाटलीचा वरचा कापलेला भाग पुन्हा लावून टाका. तुम्ही पाहू शकता बाटलीत सुरक्षितरित्या हे कप एका कोपऱ्यात राहतील. कप हे असं भांडं आहे जे कुठे ना कुठे पडून आपल्या हातून निसटून फुटतंच. कपचा थोडा जरी भाग फुटला की तो कप वाया गेला. पण प्लॅस्टिक बाटलीत अशा पद्धतीने कप ठेवल्याने ते फुटणार नाहीत.

दुसरं म्हणजे बाटलीचा वरचा झाकणाकडील भाग कापा. त्यानंतर बाटलीला वरच्या बाजूने आणि तळाशी व्हिडीओत दाखवल्याप्रमाणे छिद्र करून घ्या. बाटलीच्या वरच्या बाजूला केलेल्या छिद्रातून दोरी बांधून घ्या. आता ही बाटली किचन सिंक जिथं तुम्ही भांडी घासता तिथं लटकवा. याचा उपयोग काय? तर जेव्हा तुम्ही चमचे, चाकू, सुरी धुवाल तेव्हा ते यामध्ये टाका. ही भांडी धुतल्यानंतर आपण कशीही ठेवतो आणि मग हवी तेव्हा त्यावेळेला ती आपल्याला सापडत नाहीत. पण अशा पद्धतीने ठेवल्याने ती सहज सापडतील आणि या चमचा सुऱ्यांचा किचनवर पसाराही होणार नाही.

युट्युब चॅनेलवर हा व्हिडीओ पोस्ट करण्यात आला आहे. तुम्हाला हा जुगाड कसा वाटला आम्हाला आमच्या सोशल मीडियाच्या कमेंट बॉक्समध्ये नक्की सांगा.