Pune Cat: 3BHK फ्लॅट, 300 मांजर आणि त्या दोघी! पुण्यात हे काय सुरू आहे? शेजाऱ्यांत घबराट..

पुणे : पुण्यात कधी काय होईल याचा काही नेम नाही. आता असाच एक धक्कादायक प्रकार समोर आला आहे. पुण्यातील हडपसर भागात राहणाऱ्या एका महिलेने एक दोन नव्हे तर तब्बल 300 हून अधिक मांजर पाळले आहेत. विशेष म्हणजे गेल्या 4 वर्षांपासून मार्व्हल बाउंटी कोऑपरेटिव्ह हाऊसिंग सोसायटीतील 3बीएचके फ्लॅटमध्ये या मांजरांसह एक महिला राहतेय. त्यामुळेच हा विषय चर्चेचा विषय ठारत असून रहिवाशांमध्ये भीतीचे वातावरण आहे. लोकल18 सोबत बोलताना येथील रहिवाशांनी याबाबत माहिती दिलीये.

जेवण तयार करताना असो की इतर वेळेस जेव्हा दरवाजा, खिडकी उघडतो तेव्हा प्रचंड घाण वास येतो. 2020 मध्ये आम्हाला समजलं की 9 नंबर फ्लॅट मध्ये राहणाऱ्या रहिवाशांकडे मांजर आहेत. परंतु तेव्हा त्यांच्याकडे 50 मांजरी असल्याचं समजलं तेव्हा भीती वाटत होती. आम्ही पुणे महानगर पालिका, पोलीस प्रशासन यांच्याशी संवाद साधून त्यांच्याकडे या प्रश्नासबंधित तक्रार देखील दाखल केली. आता पालिका प्रशासनाने त्यांना या सबंधित विषयावर नोटीस देखील दिली आहे, असं एका रहिवासी महिलेनं सांगितलं.