कृषी हवामान : पावसाचा जोर वाढणार की ओसरणार? पिकांचं मोठं नुकसान,किती जिल्ह्यांना अलर्ट?

कोल्हापुरात पंचगंगा नदीने धोक्याची पातळी ओलांडली असून आंबेवाडी व चिखली गावांना स्थलांतर करण्याच्या सूचना जिल्हाधिकाऱ्यांनी दिल्या आहेत. नाशिकमध्ये गंगापूर धरणातून 6,340 क्युसेक पाणी सोडल्याने गोदावरी नदी पात्रात पाणी वाढले आहे. रामकुंड, गोदाघाट परिसर पाण्याखाली गेला आहे. पुण्यात चासकमान धरण ओव्हरफ्लो झाल्याने 24 हजार क्युसेक पाण्याचा विसर्ग करण्यात आला असून भीमा नदीत पूरस्थिती निर्माण झाली आहे. इंदापूर तालुक्यात अनेक पूल व बंधारे पाण्याखाली गेले असून वाहतूक विस्कळीत झाली आहे. हवामान खात्याने नाशिकसाठी रेड अलर्ट, तर पालघर जिल्ह्यासाठी ऑरेंज अलर्ट जारी केला आहे. येत्या काही तासांत मुसळधार पाऊस होण्याचा अंदाज आहे.

गेल्या काही दिवसांपासून मुसळधार पावसामुळे खरीप पिकांना मोठा धोका निर्माण झाला आहे.  शेतकऱ्यांनी पिकांची काळजी घेणे गरजेचे आहे. भातासारख्या पाण्याच्या पिकांमध्ये निचरा होण्यासाठी पाटबंधारे खुली ठेवावीत. सोयाबीन, मका, भुईमूग यांसारख्या पिकांच्या शेतात पाणी साचू देऊ नये, अन्यथा मुळे कुजण्याचा धोका आहे.